«Ռոբերտ Քոչարյանը ընդդիմադիր ուժերի միավորումը համարում է իռացիոնալ քայլ». Կարեն Վրթանեսյան

Ռազմական փորձագետ Կարեն վրթանեսյանի ֆեյսբուքյան գրառումը. «Ռոբերտ Քոչարյանի խոսքը՝ բառացի, իր հարցազրույցի տեսանյութից. «Եվ երբ որ ասում են՝ ինչի ձեր ուժերը չեք միացնում և այլն, և այլն, ես ավելացնեմ. ուժերը միացնելը երբեք ինքնանպատակ չի լինում։ Ուժերը միացնելը ի՞նչ նպատակ է հետապնդում։ Մի հատ փորձենք տրամաբանենք։ Միացնում են այն ժամանակ, երբ որ սիներգիայի էֆեկտ է ստացվում։ Օրինակ՝ 5+5-ը դառնում 12... 11... 14։ Եթե 5+5-ը դառնում է 7, ուժերը չեն միացնում։ Հիմա մեր մոտ պատկերը այնպիսին է, որ այդ սիներգիան չի աշխատելու։ Եթե մենք սենց կոպիտ ասած փորձենք միասին ինչ-որ բաներ անել, իմ համակիրների մի մասը, որը չէր ընդունում երրորդ նախագահին, պասիվանալու են, հեռուանալու են, հիասթափվելու են։ Նման պատկեր ունենալու ենք նաև երրորդ նախագահի թիմում։ Հիմա դուք ինչի՞ եք անպայման ուզում, որ մենք կատարենք իռացիոնալ քայլ, որի արդյունքը կասկածելի է»։
Գրել եմ. «Այսօր Ռոբերտ Քոչարյանը փաստացի հայտարարեց, որ գնալու է ընտրությունների և որ ընդդիմության միավորումը «իռացիոնալ քայլ է»։
Հիմա Քոչարյանի մի խումբ «Պապից ավելի կաթոլիկ» աջակիցներ ինձ մեղադրում են, թե «խմբագրել եմ նախագահի ասածը» ու որոշել են, իրենց կարճ խելքով, ինձ shaming անել։
Ի՞նչն է «խմբագրած»։ Իր խոսքի գլխավոր ուղերձը շատ հստակ փոխանցել եմ. Ռոբերտ Քոչարյանը ընդդիմադիր ուժերի միավորումը համարում է իռացիոնալ քայլ։
Իր այս պնդումն ահավոր սխալ եմ համարում։ Եթե ինչ-որ մեկին թվում է, որ կարող է ինձ լռեցնել, որ չխոսեմ այսպիսի սխալների մասին, սխալվում է։
Ոչ ոք չի կարող ինձ ասել, թե ես ինչ կարծիք պիտի ունենամ, պիտի՞ այդ կարծիքը հնչեցնեմ, թե ոչ։ Ինչպես նաև ոչ ոք չի կարող ինձ ասել, թե ում քննադատեմ, ում հետ համաձայնվեմ։
Հ.Գ. Հա, մեկ էլ հիշել են, որ համարձակվել եմ լուսաբանել Զանգ / Zang շարժումը: Դե հա, մոռացել էի ձեր թույլտվությունը հարցնել...»: