«Ուկրաինայում պատերազմը ոչ միայն նրանց ճակատագիրն է որոշում, այլև մեր». Արման Բաբաջանյան

ԱԺ նախկին պատգամավոր Արման Բաբաջանյանի գրառումը. «Լրացավ ռուս-ուկրաինական պատերազմի երրորդ տարելիցը։ Երեք տարի շարունակ Ուկրաինան պայքարում է ոչ միայն իր անկախության, այլև ամբողջ ազատ աշխարհի համար։ Այն սահման է, որտեղ կանգնեցվել է կայսերապաշտության տարածումը, կայսերական ախորժակով ոտնձգողը, որտեղ որոշվում է ոչ միայն Կիևի, այլև Երևանի, Թբիլիսիի, Վարշավայի, Վիլնյուսի և ազատության ձգտող բոլոր ժողովուրդների ապագան։
Պատմությունը ցույց է տվել, որ երբ մի բռնապետ որոշում է, որ մեկ այլ պետություն չպետք է գոյություն ունենա, դա սպառնալիք է դառնում բոլոր այն ազգերի համար, որոնք պայքարում են իրենց ինքնիշխանության համար։ Ուկրաինացիները միայն իրենց համար չեն կռվում։ Նրանց դիմադրությունն ու արյամբ վճարած գինը հարվածել են ռուսական կայսերապաշտությանը, որի ազդեցության թուլացումը նաև Երևանին հնարավորություն է տվել ընտրելու և սեփական ճանապարհը որոշելու։
Ուկրաինական պատերազմը բացառիկ օրինակ է, անկախ դրա ելքից։ Այն ապացուցեց, որ փոքր պետությունները կարող են պայքարել, դիմակայել, ինքնակազմակերպվել և հաղթահարել նույնիսկ թվացյալ անպարտելի ուժերին։ Այն ցույց տվեց, որ ազգային ոգին, պայքարելու կամքը և համերաշխությունը կարող են կոտրել զավթիչի բոլոր պլանները։
Ուկրաինան երեք տարի դիմակայում է հզոր հակառակորդին, ու չնայած այսօր ի հայտ եկած աներևակայելի նոր իրողություններին, չի ընկրկում։
Այս պատերազմը ցույց տվեց, որ ինքնիշխանությունը նվեր չէ, այլ ամեն օր պաշտպանելու, կառուցելու և ամրապնդելու արժեք։ Այն ապացուցեց, որ ժողովուրդները չեն պարտվում, եթե չեն հանձնվում։
Ուկրաինան պայքարում է ազատության համար, և այս պատերազմը ոչ միայն նրանց ճակատագիրն է որոշում, այլև մեր։
Փառք Ուկրաինային։
Փառք Ազատությանը։
Փառք ազատության համար պայքարող բոլոր ժողովուրդներին։
Փառք Հայաստանին, որ ունենա ուժ, դիմադրողունակություն և իմաստնություն՝ կառուցելու հզոր պետականություն, որը կդառնա համայն հայության միակ նպատակը։
Հայաստանը առավել արժեքավոր է, քան ցանկացած այլ հարց, որն այս կամ այն կերպ կապվում է հայության հետ, ածանցվում է հայկական հարցին։
Հայ դատը հենց Հայաստանն է, նրա անկախ և ինքնիշխան գոյությունը:
Վրեժ ես ուզում՝ կառուցիր հզոր հայկական պետություն։
Ուժեղ պետությունը միակ վրեժն է, որն իմաստ ունի, միակ հաղթանակն է, որ մնայուն է։
Միայն դա կերաշխավորի հայ ժողովրդի անվտանգությունն ու ապագան։
Միայն հզոր հայկական պետականությունն է, որ կփակի բոլոր պատմական հաշիվները՝ ոչ թե անցյալի դառը հիշողություններով, այլ ապագայի անվերադարձ հաղթանակով»։