«Այս դրվագներն աշխարհում ծավալվող զարգացման միտումների մասին են»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը․ «Մեծ Յոթնյակի օնլայն գագաթնաժողովին Ֆրանսիայի նախագահը մասնակցում է Թրամպի աշխատասենյակից, այն էլ տեղ ստանալով սեղանի ծայրին, ինչպես փոխնախագահ Վենսը: Աշխատասենյակում չկա ֆրանսիական դրոշ: Չկա երկու երկրի նախագահի մասնակցությանը բնորոշ արարողակարգային դասավորություն: Դա ակնհայտ անպատշաճություն է Մակրոնի հանդեպ: Դա իհարկե վկայում է բարդ հարաբերությունների մասին, թե նրա և Թրամպի միջև, թե Եվրոպայի իմաստով: Երկրպագուների համար այս անդրադարձս ընկալվելու է իբրև չարախնդություն: Դե, զարմանալի չէ, կլինեն նաև այդպիսի ընկալումներ, որովհետև մեզանում քաղաքականությանը ֆուտբոլային խաղի տրամաբանությամբ մոտենալը զարմանալի չէ: Բայց, այստեղ խնդիրը բացարձակապես չարախնդալը չէ: Այս դրվագները պետք է լինեն դիտարկման արժանի այնպես, ինչպես քաղաքական անցուդարձի բովանդակությունը, որովհետև այս դրվագները ևս ի ցույց են դնում շատ բան: Իսկ այդ ամենը մեզ անհրաժեշտ է մեր շուրջ գոյություն ունեցող աշխարհն ու դրանում ծավալվողի զարգացման միտումներն ու տրամաբանությունը հնարավորինս ամբողջական դիտարկելու և հասկանալու համար»: