«Խոսքը չի վերաբերվել զինծառայողներին և զոհվածներին»․ Դավիթ Խուդաթյան

«Դիտել եմ այն տեսանյութը, որտեղ պարոն Սարիկ Մինասյանն ասում է, որ բավարար չափով չենք կռվել՝ առաջին հերթին նկատի ունենալով բոլորիս»,- անդրադառնալով Գյումրու քաղաքապետի թեկնածու Սարիկ Մինասյանի երեկվա հայտարարությանը՝ լրագրողների հետ զրույցում ասաց ՏԿԵ նախարար Դավիթ Խուդաթյանը․ «Նա ասում էր, որ յուրաքանչյուրս մեր պատասխանատվության չափը ունենք պատերազմի ողբերգական ելքի մեջ։ Խոսքը չի վերաբերվել բանակի զինծառայողներին, զոհված զինծառայողներին։ Նրա միտքը կոնտեքստից կտրված է ներկայացվել։ Սարիկ Մինասյանը պարզաբանել է իր խոսքերը, որին ավելացնելու բան չունեմ»,- հավելեց նախարարը։
Հիշեցնենք, որ երեկ լրագրողի հետ զրույցում Սարիկ Մինասյանն ասել էր, «Արցախը ոչ թե Նիկոլ Փաշինյանն է հանձնել, այլ չենք կռվել»:
Եվ քանի որ նրա այս հայտարարությունը լայն քննադատության էր արժանացել, ֆեյսբուքյան գրառմամբ պարզաբանումներ էր տվել՝ գրելով․ «Սեփական որդիներին փողի դիմաց բանակից թռցրածներն ու դրանց գրպանից ռոճիկ ստացողները որոշել են, որ պիտի բարոյականության դասեր տան։
Ձեր երեսպաշտ, կեղծավոր էությունը էն ամենամեծ դավաճանությունն է, որ տեսել է էս երկիրը, որ տեսել են մեր զոհված հերոսները։
Եթե ձեզ սովորեցրել են, թե լկտիությամբ հնարավոր է ամեն ինչի հասնել, ու եթե սուտն ու կեղծիքը ամենալկտի ձևով պնդեք՝ այն կդառնա իրականություն, շատ սխալ են սովորեցրել, որովհետև բարոյականությունը ու ազնվությունը միշտ էլ հաղթում են երեսպաշտությանն ու կեղծավորությանը։
Դե իսկ կոնկրետ հարցի կոնկրետ ու անկեղծ տրված պատասխանը մանիպուլացնողներին մի ուրիշ առիթով կանդրադառնանք»։