«Ավրորա»-ի հավակնորդներից Սայիդա Ղուլամ Ֆաթիման մտադիր է մեկնել Բաքու և ներկա լինել Ռուբեն Վարդանյանի «դատավարությանը»

Ադրբեջանագետ Տաթևիկ Հայրապետյանը ֆեյսբուքյան իր էջում գրել է․ «Free Armenian Prisoners-ը իր Х -ում տեղեկացնում է, որ պակիստանցի իրավապաշտպան, 2016թ. «Ավրորա» մրցանակի հավակնորդներից Սայիդա Ղուլամ Ֆաթիման մտադիր է մեկնել Բաքու՝ ներկա գտնվելու Ռուբեն Վարդանյանի «դատական» լսումներին: «Հեշտ է հեռվից դատապարտել անարդարությունը, մինչդեռ իրական փոփոխությունը գործողություն է պահանջում: Այդ իսկ պատճառով ես որոշել եմ մեկնել Բաքու՝ ներկա գտնվելու Ռուբեն Վարդանյանի դատական լսումներին: Խնդրում եմ միացեք ինձ՝ ցույց տալու ձեր համերաշխությունը ինչպես կարող եք»,- փոխանցել է իրավապաշտպանը:
Հավելեմ, որ օրեր առաջ Եվրոմիությունում Ադրբեջանի ներկայացուցչության ղեկավար, Բելգիայում և Լյուքսեմբուրգում դեսպան Վագիֆ Սադիգովը իր X-ի էջում գրառման մեջ նշել էր․ «Հարկ է նշել, որ Բաքվում դատական ​​գործընթացները բաց են հանրության, լրատվամիջոցների և օտարերկրյա դիվանագետների համար։ Այնպես որ, համբերեք, ճշմարտությունը ի հայտ է գալիս…»։
Շատ լավ է, եթե բաց է, ապա պակիստանցի իրավապաշտպանի մուտքը չպետք է խոչընդոտեն։ Սա կարևոր քայլ կդառնա, այս գործընթացին միջազգային հնչեղություն տալու առումով»։