««Նիկոլը Պրահայում Արցախը հանձնեց» թեզով ՀՀ-ն ագրեսոր ենք հռչակում». Մհեր Հակոբյան

Ռազմական հարցերով վերլուծաբան Մհեր Հակոբյանի ֆեյսբուքյան գրառումը. «Եթե Նիկոլը Պրահայում չստորագրեր Ադրբեջանի տարածքային ամբողջականության ճանաչումը՝ 86.600 կիլոմետր քառակուսին, որի մեջ մտցրել են Արցախն ու անկլավները, ապա ռուսը դուրս չէր գա Արցախից, ոչ էլ բլոկադան կլիներ, ոչ էլ էթնիկ զտումը,- պնդում է ֆեյսբուքյան ընկերներիցս մեկը:
ՈՉ,- պատասխանում եմ ես,- այն մարդիկ, որոնք պնդում են, թե ես ռուս եմ պաշտպանում, թող տեսնեն այս «ՈՉ»-Ը և մտածեն, թե արդյո՞ք իրենք չեն սխալվում: ՈՉ, Պրահան կապ չունի: Դա Հայաստանի Հանրապետության և Ադրբեջանական Հանրապետության միջև տարածքային կոնֆլիկտ չէր, որ ՀՀ ղեկավարը հրաժարվեր այդ տարածքներից և հարցը որոշվեր: Ոչ, դա ռուսներին արդարացնող նարատիվ է և ես այն չեմ ընդունում: Հազար Նիկոլ ընդուներ Ադրբեջանական Հանրապետության տարածքային ամբողջությունը, դա ի՞նչ կապ ունի արցախահայության ինքնորոշման իրավունքի հետ, որը իր այդ իրավունքն իրացրել էր միջազգային իրավական նորմերի և ԽՍՀՄ սահմանադրության համաձայն: Ի դեպ, այս պայմաններում որևէ իրավական տարբերություն չկա, Հայաստանի Հանրապետությա՞ն, Վրաստանի՞, Ռուսաստանի՞, թե՞ Կոլումբիայի նախագահն է ընդունել Ադրբեջանական Հանրապետության տարածքային ամբողջականությունը:
Բացի այդ, այստեղ մեկ այլ վտանգավոր պահ էլ կա, քանզի, եթե համաձայնում ենք՝ «Նիկոլը Պրահայում Արցախը հանձնեց» թեզի հետ, ապա դրանով ոչ միայն ոչնչացնում ենք արցախահայության ինքնորոշման իրավունքը, այլև Հայաստանի Հանրապետությանը ագրեսոր ենք հռչակում, Հայաստանի Հանրապետությունը ագրեսոր է դառնում, իսկ Ադրբեջանական Հանրապետությունը՝ իր շահերի համար արդարացի պայքարող:
Չի կարելի, ինչպես էլ վերաբերվենք Նիկոլին, չի կարելի «Պրահայի այդ թեզը» կրկնել»: