«Ձերբակալվածներ կան նաև Մարտուն Գրիգորյանի նախընտրական շտաբից»․ ԶԼՄ

Գյումրիում իրականացված խուզարկությունների արդյունքում կան ձերբակալված անձինք:

Հակակոռուպցիոն կոմիտեից «Հայկական ժամանակ»-ին են հայտնել այս տեղեկությունը՝ նշելով, որ խուզարկություններն ու ձերբակալությունները տեղի են ունեցել կոմիտեում քննվող քրեական վարույթների շրջանակներում:
Լրատվականի տեղեկությամբ՝ ձերբակալված անձինք կան նաև Գյումրու համայնքի ղեկավարի թեկնածու Մարտուն Գրիգորյանի նախընտրական շտաբից:

Հիշեցնենք՝ առավոտյան իրավապահները մտել են «Մայր Հայաստան» դաշինքի գրասենյակ և խուզարկել շտաբի պետ Արա Ոսկանյանի բնակարանն ու «Մայր Հայաստան» դաշինքի ընդհանուր գրասենյակը: Խուզարկվել են նաև Մայր Հայաստան դաշինքի համակիրներից և աջակիցներից մի քանիսի բնակարանները:

Խուզարկություններ են իրականացվում նաև Մարտուն Գրիգորյանի նախընտրական շտաբերում:

Ավելի վաղ Հակակոռուպցիոն կոմիտեից հայտնել էին, որ ստացված տվյալների համաձայն՝ ընտրողներին առաջարկվել է ընտրակաշառք՝ Գյումրիի ավագանու արտահերթ ընտրություններում առաջադրված կուսակցության օգտին քվեարկելու պայմանով: