Պուտինն առաջարկել է Ուկրաինայում ժամանակավոր կառավարում՝ ՄԱԿ-ի հովանու ներքո

ՌԴ նախագահ Վլադիմիր Պուտինն առաջարկել է ԱՄՆ-ի, եվրոպական երկրների և Ռուսաստանի «գործընկերների և բարեկամների» հետ քննարկել ՄԱԿ-ի հովանու ներքո Ուկրաինայում ժամանակավոր միջազգային կառավարում ներդնելու հնարավորությունը, հայտնում է ՏԱՍՍ-ը։

Արտաքին վերահսկողությունը հնարավորություն կտա Ուկրաինայում ընտրություններ անցկացնել և «իշխանության բերել մի կառավարություն, որը վայելում է ժողովրդի վստահությունը», կարծում է Պուտինը։ Նման իշխանության հետ Ռուսաստանը կարող է բանակցություններ սկսել խաղաղության պայմանագրի շուրջ և ստորագրել փաստաթղթեր, որոնք «կճանաչվեն ողջ աշխարհում և կլինեն հուսալի և կայուն»:

Ռուսաստանի համար այժմ անհասկանալի է, թե ում հետ պետք է ինչ-որ բան ստորագրի, քանի որ «վաղն ի հայտ կգան այլ առաջնորդներ», - ասել է ՌԴ նախագահը:

«Ես չեմ ասում, որ ուրիշներ տարբերակներ չկան, բայց սա տարբերակներից մեկն է, և ՄԱԿ-ի աշխատանքում նման պրակտիկա գոյություն ունի»,- հավելել է Պուտինը: