«Թող չմիավորվեն, ՔՊ-ն կշահի, իրենք էլ կմնան կոտրած տաշտակի առաջ»․ Միքայել արքեպիսկոպոս Աջապահյանը՝ Գյումրիի քաղաքապետի ընդդիմադիր թեկնածուների մասին

«Չեն միավորվում, թող չմիավորվեն, իրենց համար է դա ողբերգություն․ ՔՊ-ն կշահի, թող իրենք էլ մնան կոտրած տաշտակի առաջ, ինչքա՞ն կարելի է իրենց հետևից վազել։ Իրենց ողբերգությունն է, աշխարհը չի քանդվի»,- այս մասին «24Նյուզ»-ի հետ զրույցում նշեց Շիրակի թեմի առաջնորդ Միքայել արքեպիսկոպոս Աջապահյանը՝ անդրադառնալով դիտարկմանը, որ Գյումրիի քաղաքապետի ընտրություններից հետո ընդդիմադիր թեկնածուները կարծես թե չեն միավորվում։
Աջապահյանը հավելեց, որ պատրաստակամություն է հայտնել ընդդիմադիր թեկնածուներին միավորելու հարցում, բայց իրենց կողմից չկա այդ պատրաստակամությունը։ «Ոչ իմ տարիք և ոչ էլ իմ հանգամանքը թույլ չեն տալիս, որ ես վազեմ իրենց հետևից։ Հրավիրեցի, հորդորեցի, պատգամեցի, ջանքեր թափեցի․․․ Դրանից ավելի ի՞նչ անենք։ Ուզում են միավորվեն, թող միավորվեն, չեն ուզում, թող չմիավորվեն, դեմոկրատիա է։ Օպտիմալ լուծումն այն կլիներ, որ ընրություններին ընդդիմությունը մեկ դեմքով հանդես գար, չուզեցին․․․ Հիմա քաղաքի գերագույն շահը պահանջում է ընդդիմության միավորում՝ առանց նախապայմանների։ Եթե չեն միավորվում, ուրեմն առանձին շահեր ունեն»,- նշեց Շիրակի թեմի առաջնորդը։
Արձագանքելով հարցին՝ իսկ եթե ընդդիմությունը չմիավորվի, դրանից գյումրեցին չի՞ տուժի, Աջապահյանը պատասխանեց․ «Գյումրեցին միշտ էլ տուժել է և հիմնականում տուժել է իր ընտրությունների պատճառով։ Հիմա էլ այնպիսի ընտրություն է կատարել, որ ռեբուս է»։