«Չարժե բառախաղի մեջ մտնել՝ նոր նախապայմաններ, հին նախապայմաններ». Սարգիս Խանդանյան

ԱԺ-ում ՔՊ-ական պատգամավոր Սարգիս Խանդանյանի հետ զրույցում լրագրողներն անդրադարձել են Ալիևի այսօրվա հայտարարությանը, ըստ որի՝ «նախ պետք է վերացնել ԵԱՀԿ Մինսկի խումբը, երկրորդ հարցը վերաբերում է Հայաստանի Սահմանադրությանը»: «Ալիևն ասել է, որ Ադրբեջանը լրացուցիչ պայմաններ չի առաջադրում, դրանք այն պայմաններն են, որ երկար ժամանակ է՝ Երևանին հայտնի են ու եթե կատարվեն, որևէ խոչընդոտ չի ստեղծվի: Ի վերջո, ինչպե՞ս է սա հանգուցալուծվելու»,- դիմելով Խանդանյանին՝ հարցրել են լրագրողները: Պատգամավորն ասել է, որ չարժե բառախաղի մեջ մտնել՝ հին նախապայմաններ, նոր նախապայմաններ, դրանք կան ու նախապայմաններն են. «Մեր դիրքորոշումներն էդ հարցերով հստակ են. Սահմանադրության մասով, որ խաղաղության պայմանագիրն ամբողջությամբ լուծում է Սահմանադրության խնդիրը, եթե այդպիսի խնդիր նույնիսկ լիներ, իսկ մենք հավատում ենք, որ այդպիսի խնդիր չկա: Իսկ ԵԱՀԿ ՄԽ մասով ասել ենք, որ պատրաստ ենք դիմել ՄԽ-ն լուծարելու՝ ստորագրմանը զուգահեռ կամ ստորագրումից հետո, որովհետև պետք է ինստիտուցիոնալ խաղաղություն առնվազն հաստատվի, փաստաթուղթ լինի, որը հնարավորություն կտա կոնֆլիկտի լուծմանը վերաբերող մեխանիզմներից հրաժարվել: Թե ինչպես կհանգուցալուծվի, ժամանակն ու բանակցությունները ցույց կտան»,- շարունակել է ՔՊ-ականը: