«Հայաստանին անընդունելի պայմաններ առաջադրելով՝ Ալիևը պատերազմ է նախաձեռնում»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Հայաստանին անընդունելի պայմաններ առաջադրելով՝ Ալիևը պատերազմ է նախաձեռնում
Ադրբեջանի նախագահ Իլհամ Ալիևը նշել է Հայաստանի հետ խաղաղության պայմանագրի ստորագրման երկու հիմնական պայման: Ալիևի խոսքով՝ նախ անհրաժեշտ է վերացնել ԵԱՀԿ Մինսկի խումբը։ «Երկրորդ հարցը վերաբերում է Հայաստանի Սահմանադրությանը։ Հայաստանի Սահմանադրությունը հղում է պարունակում Հայաստանի Անկախության հռչակագրին։ Դա Սահմանադրության բաղկացուցիչ մասն է։ Այնտեղ դրույթ կա, որ Ադրբեջանի օրինական, պատմական տարածքը միավորված է Հայաստանին, և դա համարվում է բացահայտ տարածքային պահանջ մեր դեմ»։
ԵԱՀԿ Մինսկի խումբը Հայաստանն ու Ադրբեջանը չեն ստեղծել, որ նրանք վերացնեն այն։ Եթե խաղաղության պայմանագիր չկա, ինչո՞ւ պետք է վերացնել Մինսկի խումբը։ Իլհամ Ալիևը լավ գիտի, որ Նիկոլ Փաշինյանը չունի բարձր վարկանիշ, չի կարող հանրաքվեով փոխել Սահմանադրությունը։ 2-րդ․ Ադրբեջանի սահմանադրությամբ Ադրբեջանի հանրապետությունը իրեն հայտարարել է 1918-20 թվականներին գոյատևած Ադրբեջանի դեմոկրատական հանրապետության իրավահաջորդ, այսինքն՝ այդ սահմանադրությունը տարածքային պահանջներ ունի ՀՀ տարածքի հանդեպ։ 3-րդ․ Ադրբեջանն ու Հայաստանը պայմանավորվածություն ունեին, որ խաղաղության կնքվելիք պայմանագիրը իրավական ավելի մեծ ուժ է ունենալու, քան 2 երկրների ներպետական օրենսդրությունը, ի՞նչ եղավ այդ համաձայնությունը։
Իրականում Հայաստանին անընդունելի պայմաններ առաջադրելով՝ Ալիևը պատերազմ է նախաձեռնում։ Այդ պատերազմը նա կարող է սանձազերծել, երբ խոշոր տերություններից սկսելու «դաբրո» ունենա»։