«ՔՊ-ն ապացուցել է՝ իրենք ոչ մի սրբություն ու սկզբունք չունեցող ցեղատեսակ են»․ Արմինե Օհանյան

«Հրապարակ» օրաթերթի խմբագիր Արմինե Օհանյանի ֆեյսբուքյան գրառումը․ «Արդեն 7 տարի իշխանության գտնվող քաղաքական ուժը ինչո՞վ է այս ընթացքում աչքի ընկել: Նրանով, որ քանդել ու ավերել է համակարգեր, մեխանիզմներ, հարաբերություններ, արժեքներ, ավանդույթներ... Ամայացրել ու զրոյացրել ամեն ինչ, նսեմացրել հայի անցած ուղին, պատմությունը, արժեզրկել ձեռքբերումները, փորձեր արել ջնջելու ազգի հիշողությունն ու պատմությունը: Իսկ ի՞նչ է քարոզել ու ներդրել. Փոփոխականություն, անհավատարմություն, քաղաքական անհասկանալի կողմնորոշում, սպառողական մոտեցում ամեն ինչին, որի կրողն ինքն է, որի համար ո՛չ մարդկանց հետ համատեղ անցած ուղին է կարևոր, ո՛չ միասին կերած աղուհացը, ո՛չ իրենց նախնիների պատմությունը, ոչ դարերով մշակված ավանդույթները: Ապացուցել է, որ իրենք ոչ մի սրբություն ու սկզբունքներ չունեցող ցեղատեսակ են, ում համար լրիվ մեկ է՝ Արցախ կլինի՞, թե՞ ոչ, Արցախում հայե՞ր կապրեն, թե՞ քոչվոր ցեղեր, Սիրիայում հայե՞ր կմորթվեն, թե՞ ալավիներ, Արցախից մազապուրծ եղած հայերը կարտագաղթե՞ն, թե՞ կմնան Հայաստանում, Ռուսաստանում ապրող հայերն աշխատանք ու եկամուտ կունենա՞ն, թե՞ ոչ, ԱՄՆ-ից հայերին դեպորտ կանե՞ն, թե՞ ոչ, Ֆրանսիայում հայ համայնքն ուժեղ կլինի՞, թե՞ ոչ... Ոչինչ սրանց չի հուզում՝ միայն իրենց աթոռներն ու իշխանությունն է հուզում, և սրանց բոլոր քայլերն ու արարքներն ուղղված են հենց այդ նպատակին: Ինչպես անել, որ մի Սարիկ ընտրվի Գյումրիում, մի Ակա շարունակի պաշտոնավարել Վանաձորում, մեկական Գարիկ ու Տավրոս գտնեն, որոնք զոռով-շառով համայնքապետ կդառնան, որ ՔՊ-ի դրոշակն իրենց համայնքում բարձր պահեն: Ինչ անել, որ ՔՊ-ական պատգամավորները՝ բոլորը, նման լինեն Մարիա Կարապետյանին, Վահագն Ալեքսանյանին, մյուսներին, որ միայն թրքահպատակության քարոզ անեն եւ իրենց հակառակորդների «բերանին գան»»: