«Ո՞վ է Ալենին ներշնչել, որ թքող ղեկավարներին ավելի երկար են հիշում». Վահե Սարգսյան

Պատմաբան, խմբագիր Վահե Սարգսյանի ֆեյսբուքյան գրառումը․ «Քրիստինե Վարդանյանի այսօրվա սպանիչ ելույթից ցայտնոտի մեջ ընկած Ալեն Սիմոնյանը իրեն սազական մի պատասխան տեքստ է գրել՝ վերջում ավելացնելով, թե, իբր, ինքը Քաջազնունին չէ, բայց Քրիստինեն իր անունն ավելի երկար է հիշելու, քան Քաջազնունունը:
Թե իրականում ո՞վ է Ալենին այդպես ներշնչել, որ թքող ղեկավարներին ավելի երկար են հիշում, քան արժեք ստեղծող մեծերին, չեմ կարող հստակ ասել: Բայց մի դիպված պատմեմ՝ ամեն ինչ տեղը կընկնի:
ԽՍՀՄ փլուզման թեժ փուլում ԽՍՀՄ Գերագույն Խորհրդի նիստերից մեկում Վիկտոր Համբարձումյանը ամբիոնից խոսելիս շուռ եկավ ու հարցրեց Մ. Գորբաչովին.
- Իսկ դուք գիտե՞ք, թե ով էր Անգլիայի թագավորը Նյուտոնի օրոք:
Գորբաչովն անկեղծորեն ասաց՝ ոչ:
- Ձեզ էլ են մոռանալու,- մատը ուղղելով Գորբաչովին՝ ասաց հռչակավոր գիտնականը:
Էսքան բան»: