««Բաժանիր, որ տիրես»-ը հայերի վրա հրաշալի աշխատեց»․ Աննա Կոստանյան

ԱԺ նախկին պատգամավոր Աննա Կոստանյանի ֆեյսբուքյան գրառումը. ««Բաժանիր, որ տիրես»-ը հայերի վրա հրաշալի աշխատեց։ Երբ նայում ես, թե «դաշտում» քանի խմբավորում ու միավորում է գործում՝ լավ պլանավորած, համակարգային ու հսկայական ռեսուրսների ներդրմամբ, հետևողականորեն լծված ապականելու ամեն արժեք ու ապակայունացնելու հույսի վերջին նշույլները, հասկանում ես, որ էս բոլորի տարածած այլանդակությունների դեմ ու չեզոքացնելու ուղղությամբ ուղղակի անհնար է մենակ պայքարել՝ «միավորել» չմիավրովողներին, դասեր տալ պատմությունը, գիտելիքն ու փաստը մերժողներին, խմբային ու անձնային շահին գերակայողներին, ում նպատակներն իս սկզբանե բոլորովին էլ արդարության հաստատումն ու ազգային արժանապատվությունը վերագտնելը չէ։ Տուժում է երկիրը, անմեղ ու ազնիվ երազանքներ ունեցող մարդիկ, համընդհանուր ազգային երազանքը (եթե իհարկե երբևէ եղել է)։ Արդյունքում մնալու են ավերակներ, ջարդուխուրդ եղած պետությունն ու մի քանի շահամոլներ, ովքեր երբեք ոչնչից դաս չեն քաղելու։
Հարց է առաջանում՝ բա ո՞նց սրանց ու էս ամենի դեմն առնել. պատասխանը շատ պարզ է, չընկնել ու չտրվել օրվա տարատեսակ ապակողմնորոշող, այս կամ այն բևեռը «փառաբանող» հոսանքներին, շարժվել հավատամքով, գտնել թեկուզ քչաթիվ անհատների՝ պատրաստ պայքարելու հանուն ազգային գաղափարի, որը գոյություն ունի, բայց որի տեղը չգիտենք կամ կորցրել ենք, միշտ շեղվել մեծամասնության արհեստական թելադրանքից, հույսի զենքերը զգոն վիճակում՝ մտքերից ու քայլերից «չի ստացվելու»-ն ու տարբեր պատճառաբանություններն ու արդարացումները հանելով։
Այսօր մեզ բոլորիս լցրել են մի մեծ փչացած կաթսայի մեջ, խառնում են ու «բաշխում» տարբեր լափամանների մեջ, որ առանձին-առանձին բաժանեն «սոված» ու անարմատ «տիրողներին»։ Մենք ուզո՞ւմ ենք լինել հերթական ազգը, որ զրկվելու է ազգային պատկանելությունից ու դիմագծից՝ մնալով անհայրենիք, մենք ուզու՞մ ենք կտրվել մեր իրական արմատներից ու տարալուծվել խառնամբոխներին, դառնալ անգույն, անհոտ, անհամ մասսա՝ մի փոր հացի ու «մեկ անգամ տրված» կյանքն անարժանապատիվ ապրելու համար։ Ես որ չեմ ուզում, ու մերժում եմ բոլոր ապազգային, քանդող, արմատներս ոչնչացնող , բևեռացված ու խմբային շահին միտված օրակարագերը։ Ազգային արժեքները կարևորող, խթանող, արթնացնող ու նոր շունչ տվող էնքան մարդ կա էս մի փոքր երկրում, ուղղակի նրանց բոլորին իրար գլուխ բերողն ու միավորողը դեռ չի ինքնադրսևորվել։ Ժամանակն ու երկրում սրընթաց տեղի ունեցող իրադարձությունները կլինեն որոշիչ, թե ի վերջո ով կլինի այն մեկ համարձակն ու բավարար կամք դրսևորողը, ով կմիաբանի «արժանավորներին»։
Հ.Գ. Պատմությունն ապացուցել է, որ բոլոր ժամանակներում հենց անհատների ցուցաբերած կամքի շնորհիվ են հնարավոր դարձել դրական կամ բացասական փոփոխությունները, և հիմա ու այս «ժամանակն» էլ բացառություն չէ...»։