«Մերժում ենք Թրամփի, նրա նախորդների և արևմտյան մյուս առաջնորդների ապրիլքսանչորսյան հայտարարությունները». Անկարայի քաղաքապետ

Անկարայի ընդդիմադիր քաղաքապետ, քեմալական «Ժողովրդահանրապետական» կուսակցության անդամ Մանսուր Յավաշը X-ում գրառում է կատարել Հայոց ցեղասպանության վերաբերյալ ԱՄՆ-ի նախագահ Դոնալդ Թրամփի ուղերձի առնչությամբ։
Նշելով, որ չնայած Թրամփն, ի տարբերություն Բայդենի, չի օգտագործել «ցեղասպանություն» եզրույթը՝ այդուհանդերձ երևում է, որ «1915-ի ժամանակաշրջանի վերաբերյալ ընդհանուր դիրքորոշումը հիմնական գծերով շարունակվում է»։

«Ինչպես նախկինում, այնպես էլ այսօր մերժում ենք և մեր որդեգրած այս գիծը վճռականությամբ շարունակելու ենք»,-գրել է նա:

Ըստ նրա՝ մի շարք երկրների կողմից արված հայտարարությունների իրական նպատակները երկկողմ և տարածաշրջանային խաղաղությունը, անդորրն ու կայունությունը չեն։

Յավաշի համոզմամբ, Թուրքիա-Հայաստան և դրան զուգահեռ Ադրբեջան-Հայաստան խնդիրները բարիդրացիության հիմքի վրա ապագայակենտրոն ընկալմամբ հարատև հաղթահարումը դառնալու են տարածաշրջանի երկրների երկկողմ և տարածաշրջանային խաղաղության, բարօրության և անդորրի համար արժեքավոր սկիզբ, գրում է «Էրմենիհաբեր»-ը։

«Այս կապակցությամբ մտոհոգությամբ տեսնում ենք, որ մեր երկրի իշխանությունը, որն ԱՄՆ-ի նախկին նախագահ Ջո Բայդենի գլխավորությամբ 2021թ-ի ապրիլի 24-ին Թուրքիային ուղղված «ցեղասպանության» մեղադրանքներին ի պատասխան հայտարարում էր անհրաժեշտ քայլեր ձեռնարկելու մասին, այս հարցում արդյունավետ քաղաքականություն չի կարողանում վարել։ Ավելին՝ խնդրո առարկա հայտարարությունից հետո ԱՄՆ-ի տարբեր նահանգներում հայկական թեզերին աջակցող տարբեր կարգավորումների են գնում»-, նշել է ընդդիմադիր գործիչը։
Դիմելով Թուրքիայի իշխանություններին՝ Յավաշը նշել է.

«Մեր ազգը ցանկանում է իմանալ, թե 2021 թվականի ապրիլի 24-ից ի վեր Թուրքիան ինչ հակաքայլեր է ձեռնարկել։ Քանզի մեր իշխանության լռությունն ու արձագանքների բացակայությունը քաջալերում են հայկական շրջանակների և նրանց աջակցող ուժերի՝ մեր երկրի դեմ ուղղված քաղաքականությունը և խրախուսում են նոր, կործանարար քայլերի»,- ընդգծել է Յավաշը։

Որպես ամփոփում՝ ընդդիմադիր գործիչը նշել է, որ ևս մեկ անգամ ամբողջ աշխարհին հայտարարում են, որ մերժում են ԱՄՆ-ի նախագահ Թրամփի, բոլոր նրա նախորդների և մյուս արևմտյան առաջնորդների ապրիլքսանչորսյան հայտարարությունները։