«Զարգացման ներուժը պետք է փնտրենք մեր մեջ, ոչ թե «կապենք» Թուրքիային ու Ադրբեջանին»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Ասվում է՝ մենք չենք զարգանա, եթե չունենանք նորմալ հարաբերություն Ադրբեջանի և Թուրքիայի հետ:
Ավելորդ է ասել, որ՝ ինչքան բաց են երկրի սահմանները, այնքան ավելի մեծ է զարգացման հնարավորությունը, ներուժը:
Իհարկե Հայաստանը պետք է արտահայտի Թուրքիայի հետ հարաբերության կարգավորման ցանկություն, մտադրություն, այդ ուղղությամբ կատարի աշխատանք: Ադրբեջանի պարագան ունի իր բարդ առանձնահատկությունները, թեև այս առումով էլ՝ Հայաստանը երբեք դեմ չի արտահայտվել կարգավորմանը:
Բայց, մեր զարգացման ներուժը մենք պետք է փնտրենք մեր մեջ, այլ ոչ թե «կապենք» Թուրքիային ու Ադրբեջանին:
Եթե մենք մեր մեջ չենք գտնում այդ ներուժը այսպես ասած փակ սահմանների պարագայում, մենք դա չենք գտնելու նաև բաց սահմանների պարագայում:
Զարգացման բանալին պետք է լինի մեր միտքն ու կամքը, մեր արժեքային նկարագիրը, միմյանց հետ հարաբերությունների մեր բանաձևը:
Իսկ դրա համար պետք է համարժեք քաղաքական վերնախավ: Մենք չենք զարգանա, քանի դեռ չունենք այդպիսի վերնախավ՝ սահմանները փակ լինեն, թե բաց:
Երբ կունենանք այդ վերնախավը, կգտնենք զարգացման անհրաժեշտ ռեսուրսն ու բանաձևը, ինչի միջոցով մենք կարող ենք դուրս գալ մի նոր հարթություն, որտեղ կունենանք հարաբերության կարգավորման ուղղությամբ աշխատանքի, դիրքավորման ավելի ամուր հիմք, հետեւաբար՝ նախադրյալ:
Սա մտածողության «ալգորիթմի» հարց է՝ մենք մեզ դատապարտո՞ւմ ենք Թուրքիայի ու Ադրբեջանի «սահմանային ռեժիմի» խնամքին, թե՞ ոչ»։