«Նյու Յորքում խոսեցի Ադրբեջանի ցեղասպանական քաղաքականության մասին»․ Արտակ Բեգլարյան

Արցախի նախկին ՄԻՊ և նախկին պետնախարար Արտակ Բեգլարյանի ֆեյսբուքյան գրառումը․ «Ապրիլի 24-ին Նյու Յորքի Կոլումբիա համալսարանում խոսելու հնարավորություն ունեցա Հայոց ցեղասպանության 110-րդ տարելիցի կապակցությամբ կազմակերպված միջոցառման ժամանակ:
Իմ ելույթում ներկայացրեցի ցեղասպանության իրականացման արդի միտումները և միջազգային արդարադատության մեխանիզմները՝ Արցախի ժողովրդի դեմ իրականացված ցեղասպանության օրինակով։
Հակիրճ ներկայացրի նաև մեր հակամարտության պատմությունն ու համատեքստը՝ շեշտելով, որ ալիևյան ռեժիմը կիրառել է արդիականացված ու համակարգված մեթոդաբանություն՝ նպատակ ունենալով անաղմուկ ոչնչացնել և հայրենազրկել Արցախի բնիկ ժողովրդին: Բերեցի կոնկրետ օրինակներ, որոնք ցույց են տալիս ադրբեջանական ցեղասպանական քաղաքականության օրինաչափությունները և դիտավորությունը՝ ընդգծելով, որ դա Հայոց ցեղասպանության գաղափարական շարունակությունն է:
Իսկ հայտնի իրավապաշտպան Ջեհան Հենրին ներկայացրեց Սուդանի ժողովրդի դեմ իրականացված ցեղասպանության փորձը:
Ես հատուկ շեշտեցի, որ միջազգային արդարադատության ապահովումը պարտադիր անհրաժեշտություն է՝ և՛ ցեղասպանությունների հետևանքները հասցեագրելու, և՛ նոր ոճրագործությունների կանխարգելման համար, ինչպես մեր տարածաշրջանում, այնպես էլ ամբողջ աշխարհում»։