«Միայն փողոցի ճնշման արդյունքում է հնարավոր, որ ՔՊ-ականները միանան իմպիչմենթին»․ Աննա Գրիգորյան

«Ես կարծում եմ, որ իմպիչմենթի՝ խորհրդարանում անվստահություն հայտնելու գործընթացը, պետք է լինի մի ամբողջ պրոցեսի վերջին կետը»,- «24Նյուզ»-ի եթերում ասել է ԱԺ «Հայաստան» խմբակցության պատգամավոր Աննա Գրիգորյանը՝ անդրադառնալով վարչապետ Նիկոլ Փաշինյանին անվստահություն հայտնելու գործընթացի մեկնարկին։ Նրա խոսքով՝ պետք է լինի փողոցային ակտիվ պայքար, կոնկրետ իրավիճակում ձևավորվի համընդհանուր կոնսոլիդացիա, որի հիմնական պահանջը պետք է լինի Նիկոլ Փաշինյանի հեռացումը։ «Միայն փողոցի ճնշման արդյունքում է հնարավոր, որ ՔՊ-ականներն էլ միանան՝ արդյունքի հասնելու համար։ Առանց փողոցային ակտիվ ներգրավվածության հնարավոր չի լինելու պարտադրել ՔՊ-ականներին միանալու նախաձեռնությանը»,- նշել է պատգամավորը։ Նա ընդգծել է, որ փողոցային պայքարին և իմպիչմենթի գործընթացին զուգահեռ պետք է ներկայացվի վարչապետի այնպիսի թեկնածու, որը կարողանա ավելի մեծ կոնսոլիդացիա ապահովել, իսկ այդպիսի թեկնածու «Հայաստան» խմբակցությունը դեռևս չունի։