«ՍԴ-ի նպատակն է՝ անհեթեթ հայցերով զբաղեցնել քաղաքական հակառակորդներին»․ Դավիթ Հարությունյան

«ՍԴ որոշումը չնայած պարունակում էր դրական տարրեր, սակայն չի անդրադարձել մի շարք կարևոր հարցերի։ Այդ հարցերը մի օր տուժած անձանց գանգատով կհայտնվեն նույն ՍԴ-ում կամ ՄԻԵԴ-ում»,- ասուլիսի ժամանակ ասել է ՀՀ արդարադատության նախկին նախարար Դավիթ Հարությունյանը՝ անդրադառնալով ապօրինի գույքի բռնագանձման օրենքի վերաբերյալ ՍԴ որոշմանը։ «Եթե նախկինում օրենքը թույլ էր տալիս մեկնաբանել, որ 2+2=100, ՍԴ-ն ասաց՝ 2+2-ը 10-ից ավելի չի, բայց չկարողացավ համարձակություն ունենալ՝ ասելու, որ 2+2=4»,- նշել է Հարությունյանը և ընդգծել, որ արդյունքում ծագելու են շատ խնդիրներ, վեճեր, որի հետևանքով կտուժի և՛ քաղաքացին, և՛ պետությունը։ Հարությունյանի համոզմամբ ՍԴ նման որոշումը արված է նպատակադրված և գիտակցաբար, «որի հիմնական նպատակն է՝ ունենալ գործիք, որը հնարավորություն է տալիս զբաղեցնել քաղաքական հակառակորդներին անհեթեթ մեղադրանքներով, հայցերով՝ նրանց շեղելով քաղաքական օրակարգից»։