«ՀՀ գլխավոր դատախազությունը պարտավոր է օպերատիվ կերպով քրեաիրավական գնահատական տալ». Վահագն Ավագյան

ԱԺԲ անդամ Վահագն Ավագյանը ֆեյսբուքյան իր էջում գրել է. «Արթուր Չախոյանի նկատմամբ իրականացված բռնությունը Հայաստանում իշխանությունը զավթած ռուս-թուրքական բանդայի և դրա արբանյակ «քաղաքական» ուժերի կողմից, առավել ևս պետական պաշտոն զբաղեցնող անձի կողմից, զազրելի և դատապարտելի երևույթ է։
Պետական ինստիտուտները մասնավոր քաղաքական բանդաների վերածած ռեժիմը բռնությունը դատապարտելու և դա իրականացնողներին քրեական պատասխանատվության ենթարկելու փոխարեն իրավապահ համակարգը ծառայեցնում է տուժողին ահաբեկելու նպատակով։
Ամենասարսափելին այս ամենի մեջ այն է, որ հրապարակային ազգային դավաճանություն խոստովանած այս ուժերը իրենց հակաքաղաքակրթական և հակապետական վարվելակերպն արդարացնելու համար մեր հանրությանը պրոպագանդում են, թե իբր ծեծի ենթարկված անձը գործում է Հայաստանի ինքնիշխանության դեմ, և «աշխատում է» Հայաստանի եվրոպական ինտեգրմանը դեմ գործող քաղաքական ուժերի օգտին։
Նախևառաջ «Հանրապետություն» և «Քաղաքացիական Պայմանագիր» կուսակցությունները հանդիսանում են Հայաստանը ռուսական հովանավորությամբ Թուրանի ինտեգրման ջատագովող և այդ ուղղությամբ ակտիվ աշխատող ուժեր՝ ի հեճուկս ձևական և որևէ հիմք չունեցող արտաքին «եվրոինտեգրման» օրակարգերի, որոնք իբրև թե հետապնդվում են այս ուժերի կողմից։
Երկրորդ հերթին, որևէ քաղաքական նպատակահարմարությամբ պետական բռնությունը և ահաբեկչությունը արդարացնելը ուղիղ ճանապարհ է դեպի պետության կազմալուծումը, ինչին բնականորեն հաջորդելու է Հայաստանի քաղաքացիների ինքնապաշտպանության իրավունքից բխող և պետական ինստիտուտների իրավասությունները դադարեցնող գործողություններ։
ՀՀ գլխավոր դատախազությունը պարտավոր է օպերատիվ կերպով քրեաիրավական գնահատական տալ բռնություն գործած պետական պաշտոնյաների գործողություններին և դադարեցնել նրանց պաշտոնավարումը, հակառակ դեպքում խոստովանում է, որ հանդիսանում է ոչ թե օրենքով ստեղծված պետական ինստիտուտ, այլ մասնավոր անձանց խմբակի ծառայող զինված բանդիտական խմբավորում»։