«Երեկվա դեպքը վկայում է ճղճիմության և այն մասին, որ ոչ թե արևմտամետ են, այլ սոսկ հակառուս»․ Վահե Լոռենց

Պատմաբան, գրող, հրապարակախոս Վահե Լոռենցի ֆեյսբուքյան գրառումը․ «Արևմտամետ քաղաքական ուժերի վերաբերմունքը երեկվա թաղապետարանի դեպքի վերաբերյալ, խոսում է ոչ միայն ճղճիմությունից։
Խոսում է այն բանի մասին, որ նրանք ոչ թե արևմտամետ են, այլ՝ սոսկ հակառուս։
Իբր, քարոզում են արևմտյան արժեքներ՝ դեմոկրատիա, ազատ խոսք, համամարդկային բարձր, հումանիստ արժեքներ, բայց, ճղճիմ թայֆաբազությամբ են զբաղված։ «Իրականում, իրենց գործունեությամբ և ոճով, ոչնչով չեն տարբերվում ռսահաճո և ռուսամետ ուժերից։
Թայֆաբազություն, միայն թայֆաբազություն։ Եթե անգամ որևէ մեկը ստահակություն է գործում, բայց թիմից է՝ ուրեմն կարելի է և պետք է ամեն կերպ պաշտպանել նրա արածը՝ թքելով թե՛ քարոզած արժեքների, թե՛ արդարության, թե՛ պարկեշտության վրա։
Սա՛ է հայաստանյան երկբևեռ քաղաքական դաշտը։
Հրաժարվում եմ մասնակցել որևէ քաղաքական ակցիայի, գործողության, ընտրության թե՛ ռուսամետ, թե՛ արևմտամետ ուժերի կողմից։ Ինձ համար կա մե՛կ արդար և ազնիվ շահ․ հայամե՛տ շահը, ազգայի՛ն շահը։ Դա կլինի այն քաղաքական շարժումը կամ այն քաղաքական միավորը, որը հանդես կգա բացարձակապես համահայկական շահերի կողմից։ Դա պետք է լինի վերկրոնական, վերկուսակցական շարժում, որը կմիավորի ազգայինը և Հայաստանում ազգայնականություն կքարոզի։
Ներեցեք արտահայտությանս համար՝ ստրուկն ստրուկ է, և կարևոր չէ, թե ովքեր են նրա տերերը, կամ որտեղ են նստում՝ Կրեմլում, թե Փարիզում։ Եվ ամբողջ 19-րդ դարում հայությունը անհեթեթ պայքար մղեց ոչ թե հանուն ազգայինի, ոչ թե հանուն պետականության, արժանապատվության, այլ միայն նրա համար, որ թուրքի տակից փախչի՝ ռուսի տակ պառկի։ Չկա՛ր անկախության, ազգային պետության գաղափար։ Եվ 200 տարի անց կրկնել 19-րդ դարում մեր արած սխալները՝ ոչ միայն անհեթեթություն է, այլև՝ հիմարություն։
Մեզ ազգայնակա՛ն շարժում է պետք, որը հավասարապես կկարգավորի մեր երկրի հարաբերությունները բոլոր բևեռների հետ»։