«Գյումրեցիներից չենք խռովել․ մասնակցելու ենք նիստերին»․ Սարիկ Մինասյան

«Ուղղակի մեքենաների կայանման տեղ չկար»,- Գյումրու ավագանու նիստին ՔՊ խմբակցության ուշացումն այսպես պարզաբանեց խմբակցության ղեկավար Սարիկ Մինասյանը։ «Այն նիստերը, որոնք կարևոր են մեր քաղաքի բնականոն զարգացման համար, մասնակցելու ենք, ներկայացնելու ենք մեր ծրագրերը։ Մենք նաև, ունենալով 14 մանդատ, կարող ենք հրավիրել արտահերթ նիստեր, ներկայացնել մեր օրակարգը։ Հետևողական ենք լինելու, որ մեր նախընտրական ծրագրերը կատարվեն։ Մենք գյումրեցիներից չենք խռովում, ծառայում ենք մեր քաղաքին ու բնակչությանը»,- ասաց Սարիկ Մինասյանը։
Հարցին՝ կոմունիստների հետ համագործակցությա՞ն եք եկել, Մինասյանը պատասխանեց․ «Կոմունիստների հետ ընդհանուր հայտարարի ինչպե՞ս պիտի գանք, չգիտեմ, ես ո՜ւր, կումունիզմը ո՜ւր, հոկտեմբերիկ էլ չեմ եղել։ Անիմաստ դեմ քվեարկել հանձնաժողովների նախագահներին դա պոպուլիզմ է։ Այն հարցերը, որոնց մեջ խնդիր տեսնենք, դեմ ենք լինելու, այն հարցերը, որոնք ի օգուտ են մեր քաղաքի զարգացմանը կողմ ենք լինելու։ Ինչպես ընկեր Ղուկասյանը նշեց, ինչքան ինքն է խիստ լինելու, կրկանկի մենք ենք խիստ լինելու»,- ասաց Մինասյանը։
Նրա խոսքով փոխքաղաքապետի թեկնածու չեն ներկայացրել, քանի որ նախապես հայտարարել էին դրա մասին․ չեն պատրաստվում մասնակցել քաղաքային իշխանության ձևավորմանը։