«ՔՊ-ական պատգամավորներ կան, որոնք ևս հասկանում են՝ Նիկոլ Փաշինյանը սպառնալիք է ՀՀ-ի համար»․ Արթուր Վանեցյան

«Հայաստանում այսօր դասական ներքաղաքական իրավիճակ չէ, ՀՀ բոլոր հայրենասեր, հայկական շահն առաջ մղող ընդդիմադիր ուժերը պետք է հասկանան՝ իրականում ազատագրական պայքարի մեջ ենք, և բոլորս պետք է քայլեր ձեռնարկենք մեր հայրենիքը ներքին թշնամուց ազատագրելու համար»,- այս մասին 168TV-ի եթերում ասել է ԱԱԾ նախկին տնօրեն, «Հայրենիք» կուսակցության ղեկավար Արթուր Վանեցյանը։

Նրա խոսքով՝ ընդդիմությունն անելիք ունի՝ խոսել հանրության հետ, բացատրել՝ ինչ է կատարվում, գեներացնել տարբեր պրոցեսներ՝ սկսած փողոցային պայքարից, մինչև իրավական հնարավորություններ՝ այս իշխանություններից ազատվելու համար։

Անդրադառնալով դիտարմանը, որ ընդդիմության ոչ մի քայլը Հայաստանը «ներքին թշնամուց չի ազատում», նշել է, որ Նիկոլ Փաշինյանը և իր խմբակը ցանկացած քայլի դիմում են, որ իշխանությունը պահեն, և ընդդիմության քայլերը պետք է միտված լինեն նրանց իշխանազրկելուն, բայց դրա համար անհրաժեշտ է հանրային մեծ աջակցություն։

«Այս իշխանությունները հասկանում են, որ իրենց իշխանությունից հետո որևէ շանս չունեն մեր երկրում ապրելու․․․ Վստահեցնում եմ, որ նաև ՔՊ-ի շարքերում կան պատգամավորներ, որոնք ևս հասկանում են, որ Նիկոլ Փաշինյան վարչապետը չարիք է և լրջագույն սպառնալիք ՀՀ-ի գոյության համար»։

Հարցին՝ ինչու են Նիկոլ Փաշինյանից վախենում, հո գայլ չէ՞, Վանեցյանն արձագանքել է․ «Ավելի բեթար է։ Վախենում են»։