«Կա իմպիչմենթի 2 տարբերակ՝ «իրավական» և «քաղաքական»». Աղասի Ենոքյան

Քաղաքագետ Աղասի Ենոքյանի ֆեյսբուքյան գրառումը. ««Ծովից ծով» փոդքասթի հերթական զրույցում պարզեցինք, որ կա իմպիչմենթի 2 տարբերակ․ «իրավական» և «քաղաքական»։
Առաջին տարբերակն այն է, ինչ առաջարկում է մեր սիրելի ընդդիմությունը իր հայտարարությամբ՝ այսինքն, պետք ապահովել անհրաժեշտ քանակի ժողովրդական օժանդակություն, այնուհետև գտնել վարչապետի թեկնածու, ապահովել 36 պատգամավորի ստորագրություն, որից հետո սկսել իմպիչմենթի գործընթացը խորհրդարանում։ Այսինքն, դիմում ենք ժողովրդին, ասում․ «Ժողովուրդ ջան, մեր սիրելի ընդդիմությունը մտածում է սկսել Նիկոլի իմպիչմենթը, դրա համար պետք է հավաքվենք բողոքի ցույցի, այդ ժամանակ մեր սիրելի ընդդիմությունը կհաշվի՝ քանի հոգի ենք, եթե համարի, որ բավարար ենք, դրանից հետո կգտնի վարչապետի թեկնածու և կսկսի իմպիչմենթի ստորագրահավաքը»։ Կարծում եմ, ժողովրդի ամենահանավանական արձագանքը կլինի․ «Կարո՞ղ ա մեր սիրելի ընդդիմությունը որոշել ա մեր վրա կայֆավատ լինել»։
Երկրորդ տարբերակի դեպքում ընդդիմությունը սկսում է Նիկոլին գործից հանելու համար ստորագրություններ հավաքել, այդ ընթացքում և այդ առիթով մոբիլիզացվում են ժողովրդական զանգվածները և այդ ճնշման տակ ԱԺ-ն Նիկոլին պաշտոնանկ է անում։ Ընդ որում, սկզբում 36 պատգամավորի ստորագրության առկայությունը ոչ միայն անհրաժեշտ չէ, այլև վտանգավոր է, քանի որ անհրաժեշտ ժողովրդական ճնշման բացակայության դեպքում ԱԺ շատ արագ նիստ կգումարի և կմերժի առաջարկը, իրավականորեն ամրապնդելով Նիկոլի անփոխարելիությունը ևս 6 ամսով։
Մյուս տարբերակը հերթական ընտրություններին սպասելն է, որի վտանգավորությանը շուտով ևս մեկ անգամ անդրադարձ կկատարենք»: