«Նիկոլ Փաշինյանը զրկվել է լեգիտիմության բոլոր հիմքերից»․ Անդրանիկ Թևանյան

«Մայր Հայաստան» դաշինքի առաջնորդ Անդրանիկ Թևանյանը հատված է հրապարակել իր հարցազրույցից՝ գրելով․ «Օրվա իշխանության ներքին վախերն ու ոչ լեգիտիմությունը։ Քղաքացուն ներքաղաքական մանր գզվռտոցները, «մուտիլովկաները» չեն հետաքրքրում։ Քաղաքացուն հետաքրքրում են մեր երկրի անվտանգության հարցն ու իր կյանքին վերաբերող հարցերը։ Իշխանությունն անվտանգություն չի ապահովում, կյանքն էլ թանկացրել է։
Նիկոլ Փաշինյանը զրկվել է լեգիտիմության բոլոր հիմքերից։ Բացառությամբ՝ ընտրականի․ գոնե հանրային ընկալման մեջ դա այդպես է։ Նրա լեգտիմության վերջին փշրանքները կվերանան արտահերթ կամ հերթական ընտրություններով։ Նա դա գիտի կամ առնվազն զգում է։ Դրա համար էլ վախենում է ընտրություններից։
Ընտրություններից վախենում են նաև նրանք, ովքեր գիտեն, որ վարկանիշ ու շանս չունեն։ Այդ շանսը ստանալու համար մարգինալ շրջանակները սկսել են պատրաստվել ընտրությունների։ Ու ինչքան էլ խոսեն, թե, իբր, իրենք ընտրություններով չեն տեսնում ներքաղաքական փոփոխության հարցի լուծումը և չեն ուզում Նիկոլի հետ ընտրության գնալ, միևնույն է 2018–ից հետո Նիկոլի հետ գնացել են ու գնալու են ընտրության։ Մնացածը դեմագոգիա է։
Ամենակարևոր հարցն այն է, թե ինչ լուծումներ են լինելու հետնիկոլական Հայաստանում։ Անվտանգության ու հացի խնդիրն ինչպես է լուծվելու։ Սա՛ է գլխավորը։ Սա՛ է հուզում քաղաքացուն»։