«Նախկին իշխանության տարանջատումը Ռոբերտ Քոչարյանից սկսվել է դեռևս 2008-ից հետո». Աղվան Վարդանյան

«Այս ներքին խզումը հատկապես սկսվեց երկրորդ նախագահի վերջին մեծ ասուլիսից հետո»,- լրագրողների հետ ճեպազրույցում ասաց «Հայաստան» խմբակցության պատգամավոր Աղվան Վարդանյանը՝ անդրադառնալով նախկին նախագահների համակիրների միջև առկա տարաձայնություններին:

«Ռոբերտ Քոչարյանի հանդեպ նման վերաբերմունք եղել է տարիներ շարունակ: Այստեղ մեկը մյուսին մեղադրելը ես արդար և ազնիվ չեմ համարում, քանի որ յուրաքանչյուր ուժի շուրջ կան համակիրներ և այդ համակիրներն անհատներ են, անհատականություններ են ու փակել բոլորի բերանը ճիշտ չէ, արդար չէ, ամեն մեկն իր տեսակետն է հայտնում: Ի վերջո ինչու առաջացավ տարանջատման այդ գաղափարախոսությունը, որովհետև ակնհայտ դարձավ գոնե ինձ համար, որ եթե հնարավոր չէ լիարժեք համախմբվել, ուրեմն ճիշտը տարանջատումն է: Բայց սա նոր չէ, նախկին իշխանության տարանջատումը Ռոբերտ Քոչարյանից սկսվել է դեռևս 2008-ից հետո»,- նշեց նա: