«Խոզնավարի ու Խնածախի պրոցեսները խիստ նման են Կարմիր շուկայի պրոցեսներին»․ Մետաքսե Հակոբյան

«44-օրյա պատերազմից հետո Արցախի և ՀՀ իշխանությունների միջև որևէ կապ չկար, կար միայն երկու մարդու, Արցախի նախկին նախագահի և ՀՀ վարչապետի անձնական շփում»,- Եռաբլուրում լրագրողների հետ զրույցում ասաց Արցախի ԱԺ պատգամավոր Մետաքսե Հակոբյանը՝ անդրադառնալով հարցին, թե ինչո՞ւ Արցախի և ՀՀ իշխանութունների շփումը չի ստացվում։
«Հստակ ծրագրված էր, թե ինչպիսի ավարտ պետք է ունենար Արցախի հարցը, ինչպիսի պատմություն պետք է կերտեին։ Այդ տրամաբանության մեջ պետք է ենթադրվեր, որ իրենք պետք է մերժեին Արցախի իշխանություններին։ Նույնիսկ սոցիալական հարցերի շուրջ համագործակցություն չկա»,- ասաց Հակոբյանը։
«Վստահեցնում եմ՝ մեր պետությունը և պետականությունը վտանգված է հիմա, երբ չկա Արցախի Հանրապետություն։ Հայաստանն իր ուրույն տեղն ուզում էր գրավել Արցախի շուրջ բանակցային գործընթացը իրականացնելով։ Ի վերջո այդ բանակցությունները բերում էին արդարության հաստատման, ինչը իրենք թույլ չտվեցին՝ վտանգելով ՀՀ-ն։ Այն, ինչ հիմա տեղի ունենում Խոզնավարի ու Խնածախի ուղղությամբ, պրոցեսը խիստ նման է Կարմիր շուկայի պրոցեսներին։ Արցախի հայաթափումը սկսվեց Կարմիր շուկայից։ Աստված մի արասցե, որ այս իշխանությունների կառավարումը շարունակվի»,- ասաց Հակոբյանը՝ հավելելով, որ հիմնական նպատակը Արցախ վերադառնալն է, ինչը կլինի, եթե ազգային իշխանություն ունենանք։