«Հավատի խաչվող գույները». Ռոբերտ Էլիբեկյանի արվեստը՝ Մատենադարանի միջնադարյան ձեռագրերի կողքին

Մատենադարանում բացվել է ՀՀ ժողովրդական նկարիչ Ռոբերտ Էլիբեկյանի ծննդյան 85-ամյակին և ստեղծագործական գործունեության 60-ամյակին նվիրված «Հավատի խաչվող գույները» ցուցահանդեսը։ Ցուցադրությունում ներկայացված են նկարչի ընտանեկան հավաքածուից ընտրված գեղանկարչական, գրաֆիկական և դեկորատիվ արվեստի աշխատանքներ։

Ցուցահանդեսն առանձնանում է իր ձևաչափով․ Էլիբեկյանի ստեղծագործությունները ներկայացվում են Մատենադարանի հնագույն ձեռագրերի պատկերազարդումների կողքին։ Համադրության նպատակն է բացահայտել միջնադարյան և ժամանակակից հայկական արվեստի միջև առկա թեմատիկ ու պատկերային կապերը։

Ցուցադրությունում ընդգրկված աշխատանքներն ստեղծվել են 1972–2017 թվականներին։ Դրանցում արտացոլված են նկարչի ստեղծագործական տարբեր շրջաններն ու գեղարվեստական մոտեցումները՝ հոգևոր, խորհրդանշական և միստիկական պատկերներից մինչև դեկորատիվ լուծումներ։

Մատենադարանի ներկայացմամբ՝ Էլիբեկյանի արվեստի վրա կարևոր ազդեցություն է ունեցել հայկական միջնադարյան մշակույթը։ Նրա ստեղծագործություններում հաճախ հանդիպող կամարները, խորանանման տարածքները, հրեշտակային կերպարներն ու լույսի խորհրդանիշը ցուցահանդեսում նոր համատեքստ են ստանում՝ երկխոսության մեջ մտնելով ձեռագրերի մանրանկարների հետ։

Ռոբերտ Էլիբեկյանը ծնվել է 1941 թվականին Թբիլիսիում՝ նկարիչ Վաղարշակ Էլիբեկյանի ընտանիքում։ 1960 թվականից ապրել և ստեղծագործել է Երևանում, իսկ 1965 թվականին ավարտել է Երևանի պետական գեղարվեստա-թատերական ինստիտուտը։ Նկարչի աշխատանքները ներկայացված են Հայաստանի և արտերկրի թանգարաններում ու մասնավոր հավաքածուներում։

«Հավատի խաչվող գույները» ցուցահանդեսը դիտարկում է Էլիբեկյանի արվեստը ոչ միայն որպես առանձին ստեղծագործական ժառանգություն, այլև որպես հայկական գեղարվեստական ավանդույթի շարունակություն՝ միջնադարյան մանրանկարչությունից մինչև ժամանակակից կերպարվեստ։