«Հայրենականի օրերին օդերևութաբանները ռազմաճակատի անտեսանելի զինվորներ էին». Լևոն Ազիզյան

«Հիդրոօթերևութաբանության և մոնիթորինգի» կենտրոն ՊՈԱԿ-ի տնօրեն Լևոն Ազիզյանի ֆեյսբուքյան գրառումը. «Օդերևութաբանների դերը Հայրենական մեծ պատերազմում
Հայրենական մեծ պատերազմի առաջին օրերից խորհրդային օդերևութաբաններն իրենց մասնագիտական գիտելիքներով ու անձնվիրությամբ կանգնեցին մարտական գործողությունների առաջնագծում դառնալով ռազմաճակատի անտեսանելի զինվորներ:
1941 թվականի հուլիսի 15-ին ստեղծվեց Կարմիր բանակի Գլխավոր հիդրոօդերևութաբանական վարչությունը, իսկ պատերազմի ընթացքում հիդրոօդերևութաբանական տվյալները դարձան ռազմավարական նշանակության տեղեկատվություն։
Օդերևութաբանական կանխատեսումները խիստ գաղտնագրվում էին։ Ճակատային գծերում ստեղծվեցին օդերևութաբանական ստորաբաժանումներ, որոնք վճռորոշ դեր ունեցան մի շարք կարևոր գործողությունների պլանավորման ու իրականացման գործում։
Հատուկ սարքավորումների շնորհիվ խորհրդային կողմը ստեղծեց շարժական ռադիոմետեոկայաններ, որոնք նույնիսկ թշնամու թիկունքում ավտոմատ փոխանցում էին տվյալներ՝ օգնելով ուղղել օդուժի թռիչքները և ռազմական առաջխաղացումները։
Պատերազմի ծանր տարիներին օդերևութաբանական կանխատեսումների հիման վրա հնարավոր դարձավ.
1941թ. նոյեմբերին Կարմիր հրապարակում կազմակերպել ռազմական շքերթ՝ չնայած եղանակային բարդ պայմանների,
կանխատեսել ուժեղ ցրտերը, որը թույլ տվեց սկսել Մոսկվայի հակահարձակումը,
հսկել գետերի մակարդակը և թշնամու առաջխաղացումը արգելակելու համար ստեղծել արհեստական հեղեղումներ,
ապահովել Լադոգա լճի սառույցի վրայով կյանքի ճանապարհը Լենինգրադի պաշարման ընթացքում։
Հիդրոօդերևութաբանական ծառայության մասնագետների անձնվեր աշխատանքը, կանխատեսումների ճշգրտությունն ու գիտական ներդրումները կարևոր նշանակություն ունեցան Հայրենական մեծ պատերազմի հաղթանակի գործում»: