«Իրանը լրջագույն քայլ արեց՝ կանխելու թուրք-ադրբեջանական հնարավոր հարձակումը ՀՀ-ի վրա». Նաիրի Հոխիկյան

Լրագրող Նաիրի Հոխիկյանի ֆեյսբուքյան գրառումը. «Իրանի նախագահի այցը Ադրբեջան օրերս մեծ դժգոհություն առաջացրեց Հայաստանում, մանավանդ որ բարեկամ երկրի առաջնորդը Բաքվում սիրո խոսքեր հնչեցրեց մեր թշնամու մասին։
Իրանի նախագահ Փեզեշքիանը կրկին շնորհավորեց Ադրբեջանին՝ Արցախը գրավելու համար, ապա պայմանագրեր կնքեց տնտեսական, մշակութային և այլ ոլորտներում։
Թվում էր, թե մեր ևս մի բարեկամ թեքվեց դեպի մեր թշնամին, բայց իրականում այդ քայլերով Իրանը լրջագույն քայլ արեց՝ կանխելու թուրք-ադրբեջանական ահաբեկչական հնարավոր հարձակումը Հայաստանի, ավելի կոնկրետ՝ Սյունիքի ու Գեղարքունիքի վրա։
Իրանը Ադրբեջանին առաջարկել է այնպիսի այլընտրանքային նախագծեր, որոնցից հրաժարվելու դեպքում Բաքուն հստակ ցույց կտա, որ իր նպատակը Հայաստանի վրա հարձակվելն է, հետևաբար հիմա Ադրբեջանում կանգնել են խնդրի առաջ՝ ինչպե՞ս արձագանքել Իրանին ու ամեն դեպքում հարձակվել Հայաստանի վրա։
Ադրբեջանի և Թուրքիայի նպատակը սոսկ ցամաքային ճանապարհը չէ, այլ կոնկրետ Հայաստանի հարավային շրջանները, որոնք մեր թշնամի երկու պետությունների համար կարող են ապահովել պանթյուրքիզմի անխաթար ուղին դեպի Ռուսաստանի և Իրանի մասնատում։ Հետևաբար Սյունիքը կենսական նշանակություն ունի ոչ միայն Հայաստանի, այլև առաջին հերթին նաև Ռուսաստանի և Իրանի համար՝ իրենց իսկ շահերից ելնելով»: