«Թրամփի պաշտոնական այցերը կանխորոշելու են տարածաշրջանային բազմաթիվ խնդիրների լուծումը». Արա Արայան

Վերլուծաբան Արա Արայանի ֆեյսբուքյան գրառումը․ «Մոտակա օրերին Միջին արևելքում տեղի ունենալիք՝ Դոնալդ Թրամփի պաշտոնական այցերը կանխորոշելու են տարածաշրջանային բազմաթիվ խնդիրների լուծումը:
Այցը սկսվեց Սաուդյան Արաբիայից, շարունակվելու է Քուվեյթում և ԱՄԷ-ում:
Սրան զուգահեռ մայիսի 14-15-ին Ստամբուլում կայանալու է ՆԱՏՕ-ի անդամ երկրների ԱԳ նախարարների հանդիպումը:
Սպասվում է Պուտին-Զելենսկի հանդիպում, չնայած ռուսական կողմը անում է ամեն ինչ, որպեսզի Պուտինի փոխարեն ավելի ցածր դասի պաշտոնյա հանդիպի Զելենսկու հետ:
Ռուսական կողմն առևտուր է առաջարկում իր պայմաններով:
Սակայն, Թրամփի այցը Միջին Արևելք կարող է ռուսական խաղաքարտերի հիմնական մասը զրոյացնել: Եթե Սաուդիան Արաբիան ամերիկացնիների հետ գա համաձայնության և իջեցնի նավթի գները, ռուսական կողմը կհայտնվի ծանր կացության մեջ: Սա ճնշում է նաև Իրանի վրա: Բացի դա, ԵՄ-ն արդեն իսկ Պուտինին ներկայացրել է վերջնաժամկետ 30-- օրյա զինադադար կնքելու վերաբերյալ՝ հակառակ դեպքում խոստանալով ռուսական ստվերային նավատորմի նկատմամբ կոշտ պատժամիջոցներ կիրառել:
Սաուդիան Արաբիայում հնարավոր է՝ տեղի ունենա հանդիպում Սիրիայի ժամանակավոր ղեկավար Ահմեդ ալ-Շարաաի հետ: Թրամփը գործարքի պատրաստ պրագմատիկ բիզնեսմեն է: Ահմեդ ալ-Շարաան արդեն առաջարկել է Դամասկոսում Թրամփի երկնաքեր կառուցել: Սիրիան Սաուդյան Արաբիայի և մասամբ Թուրքիայի ազդեցության ներքո, բայց հիմնականում ԱՄՆ-ի հովանավորության տակ գտնվելով սկսելու է զարգանալ և վերածվել տարածաշրջանային բալանս ապահովող կարևոր գործոնի: Սաուդները ոչ մի կերպ չեն համաձայնվելու Սիրիան Թուրքիայի ու Իսրայելի քմահաճությանը թողնելու մտքին:
Սիրիան կարևոր դեր է ստանալու նաև ԱՄՆ-ի ու Կատարի միջև սկսվելիք բանակցություններում: Ամերիկացիները ամենայն հավանականությամբ կաջակցեն վաղուց սառեցված Կատար-Եվրոպա գազատար կառուցելու ծրագրին: Կատարը ահռելի գազի պաշարներ ունի: Տարանցիկ ճանապարհը կարող է անցնել միայն Սիրիայով: Սիրիական պատերազմի հրահրման պատճառներից մեկը դա էր: Ռուսներին ու պարսիկներին ձեռնտու էր Սիրիան ռազմական պոլիգոնի վերածելը և նրանք ամեն ինչ արեցին, որպեսզի Սիրիան վերածվի ավերակների՝ հանդես գալով՝ որպես Սիրիայի դաշնակից: Կատարից խողովակաշարով գազը դեպի ԵՄ հասնելու ծրագիրը վտանգավոր է, թե Ռուսաստանի, թե Իրանի համար: Առայժմ Կատարը իր հիմնական գազը արտահանում է հեղուկ տեսքով, սակայն խողովակաշարը ավելի կարևոր է: ԱՄՆ-ն հեղուկ գազի խոշոր արտահանող է, սակայն այժմ ամերիկացիները փորձում են իրենց ձեռքը վերցնել դեպի ԵՄ գործող բոլոր խոշոր գազատարերը, այդ թվում ռուսական Հյուսիսային հոսքը և Թուրքական հոսքը: Ահա ռուս-ամերիկյան առևտրի հիմնական ոլորտներից մեկը, ինչը կարող է չեզոքացվել Կատարում:
Այս մեծ խաղում Թուրքիան ունի իր հետաքրքրությունները: Թուրքերին՝ որպես բոնուս, լուծարվեց Քրդական բանվորական կուսակցությունը: Տասնամյակներ շարունակ քրդերին Թուրքիայի դեմ օգտագործել են թե ռուսները, թե Իսրայելն ու նույն ամերիկացիները: Բայց ժամանակները փոխվել են, ի՞նչ բանվորական կուսակցության մասին է խոսքը: Դա ԿԳԲ-ի ստեղծած տրոցկիստական հոսանքներից մեկն էր, որին նաև մշտապես փորձել են ներգրավել հայերին: Չնայած հայկական և քրդական շահերը տրամագծորեն իրարից տարբեր են եղել:
Հայաստանին ձեռնտու են վերը նշված էներգետիկ ծրագրերը: Եթե դրանք իրագործվեն, էժան նավթի ու գազի պարագայում Ադրբեջանը բոլորովին այլ երկիր կդառնա: Ադրբեջանական գազի ու նավթի արտահանման աշխարհագրությունը էականորեն կփոխվի, ամենագրավիչ շուկան կդառնան հարևան երկրները, այդ թվում՝ Հայաստանը...
Սրանք Միջին Արևելքի հետ կապված հարցերի փոքր մասն են: Կան Իսրայելի, Իրանի, Պաղեստինի և իհարկե, Չինաստանի հարցերը, որոնք փոխկապակցված են:
Պատահական չէ, որ Թրամփի արտասահմանյան առաջին պաշտոնական այցը հենց Սաուդյան Արաբիայից է սկսվում:
Թարմփի պարագայում մեկ կարևոր ԼԱՎ հանգամանք կա, բիզնեսմենը կռիվ չի սիրում, խույս է տալիս կռվից, լավ բիզնեսմենը փող աշխատելու բազմաթիվ ձևեր գիտե, պատերազմների շահավետության մասին թեզերը հորինվածք են, հորինվել են «քաղաքական գործիչ» կոչվող ձրիակեր ստահակների և նրանց տերերի կողմից:
Համաշխարհային օրակարգն արդեն իսկ փոխված է և փոխվում է օր օրի: Դիկտատորների ու խամաճիկ կառավարիչների ժամանակները կավարտվեն աննկատ: Խաղաղությունը նրանց հակացուցված է»: