«Նիկոլ Փաշինյանի համար առավելագույն անհարմարավետությունը քաղաքական բովանդակությունն է»․ Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը․ «Նիկոլ Փաշինյանի ասուլիսային, լայվային, չգիտեմ ակումբային ընդդիմախոսների մի մեծ «բանակ» կա, որոնք, ամենասուր կերպով ու ամենօրյա ռեժիմով թիրախավորելով և անգամ «անիծելով» նրան, գործնականում նրան են մատուցում ամենամեծ ծառայությունը:

«Անիծեք» ու «հայհոյախոսեք» որքան ուզում եք: Դրանով ստեղծում եք նրա համար ամենաբարենպաստ միջավայրը, այն «ջուրը», որտեղ նա իրեն զգում է ինչպես ձուկ:

Նիկոլ Փաշինյանի համար առավելագույն անհարմարավետությունը դա քաղաքական բովանդակությունն է, ընդ որում ոչ թե ընդդիմախոսության հիմք, այլ հասարակության հետ աշխատանքի հիմք: Այսինքն, երբ ընդդիմախոսները ոչ թե «կռվում» են Փաշինյանի հետ, այլ աշխատում հանրության հետ:

Այո, այդ մոդելն ու մեթոդը էպատաժային չէ, այդ մոդելն ու մեթոդը տեսարանային չէ, տպավորիչ չէ, բայց դա այն է, որտեղ Նիկոլ Փաշինյանը չունի հակադրելու գործնականում ոչինչ: Դա այն մոդելն է, որտեղ Նիկոլ Փաշինյանն, «ուշադրության կենտրոնում» չլինելով, իրականում իր «քաղաքական մերկությամբ» հայտնվում է բոլորի աչքի առաջ:

Դրանից է, որ նա կարող է տագնապել ամենից շատ: Եվ հենց դա է, որ նա փորձում է թույլ չտալ՝ ներքաղաքական պրոցեսը անընդհատ պահելով իր գծած հունի մեջ: Եվ պետք է նկատել, որ այդ առումով նա աշխատում է շատ արդյունավետ: Ինքն է այդ աշխատանքային մշակումների հեղինակը, թե աշխատում են տեխնոլոգներ, այդուհանդերձ աշխատում են բավականին արդյունավետ:

Իհարկե, ցանկացած արդյունավետություն ունի հարաբերականություն: Այդ աշխատանքը ամենևին չի կանգնեցնում և առավել ևս չի վերականգնում նրա վարկանիշի էական անկումը: Բայց թույլ է տալիս նրան կառավարել դա: Հիմա Նիկոլ Փաշինյանն իր առաջ դրել է ընկած վարկանիշը և անկման շարունակվող միջավայրը կառավարելու խնդիր: Նա թերևս լավ պատկերացնում է, որ ավելիի խնդիր դնել չի էլ կարող: Այդ իմաստով, նրա հաշվարկները բավականին ռացիոնալ են, որքան էլ սպասարկվում են էմոցիոնալ բաղադրիչի ակտիվ խաղարկմամբ:

Իհարկե սա չի նշանակում, որ իռացիոնալ են նրա մրցակիցները կամ քաղաքական հակառակորդները: Նրանք էլ ունեն իրենց ռացիոնալությունը: Պարզապես, այդ ռացիոնալությունը հաշվարկողների ամենաբարձր մակարդակում թերևս չի ենթադրում Նիկոլ Փաշինյանին շրջանցելու նպատակ: Ավելին, նրանց հաշվարկները գոնե այս պահին թերևս ավելի շատ միմյանց նկատմամբ են, քան Փաշինյանի»։