«Ես չեմ խնդրել Սերժ Սարգսյանին՝ մասնակցել ընտրություններին»․ Ռոբերտ Քոչարյան

««Հայրենիքի փրկության շարժման» վերջին հատվածում երբ պարզ էր, որ պետք է ընտրություն լինի, 5-6 հոգով քննարկում էինք ընտրությունների հարցը։ Երրորդ նախագահը կտրուկ դեմ էր ընտրությանը, ես կողմ էի»,- հարցազրույցի ժամանակ ասաց երկրորդ նախագահ Ռոբերտ Քոչարյանը՝ հերքելով Հայկ Մամիջանյանի այն հիմնավորումը, թե Ռոբերտ Քոչարյանն է Սերժ Սարգսյանին խնդրել մասնակցել ընտրություններին։ Պատմելով իր և Սերժ Սարգսյանի զրույցի մասին՝ նա ասաց․ «Նրա հիմնավորումն այն էր, որ լեգիտիմացնում ենք ընտրությունները։ Իմ մոտեցումն այն էր, որ մեր մասնակցելով չէ, որ լեգիտիմացվում է։ Նա ասեց, որ ՀՀԿ-ն չի մասնակցելու»,- հայտնեց Քոչարյանը՝ հավելելով, թե դրանից հետո է իմացել, որ ՀՀԿ-ն որոշել է մասնակցել։ Նա պատմեց, որ Սերժ Սարգսյանն իրեն ասել է, թե երիտասարդներն են համոզել, որպեսզի մասնակցեն ընտրություններին։