«ՀՀ-ն ԵՄ-ին անդամակցելու հայտ չի ներկայացրել»․ Արարատ Միրզոյան

Հայաստանը Եվրոմիությանն անդամակցելու հայտ չի ներկայացրել, և այդ ուղղությամբ բանակցություններ չեն վարվում։ Այս մասին հայտարարել է ՀՀ արտգործնախարար Արարատ Միրզոյանը՝ ՌԴ ԱԳ նախարար Սերգեյ Լավրովի հետ համատեղ ասուլիսի ժամանակ՝ պատասխանելով ռուս լրագրողի հարցին։

Լրագրողը, մասնավորապես, ասել է. «Պաշտոնական Երևանը հայտարարել է, որ ԵՄ-ի հետ տնտեսական ինտեգրման ուղեգիծ է որդեգրել, որը բավականին թշնամաբար է վերաբերում ՌԴ-ին։ Այն դեպքում, երբ ՀՀ առևտրաշրջանառությունը հիմնականում ՌԴ-ի ու ԵԱՏՄ-ի հետ է, ինչպե՞ս է ՀՀ-ն պատրաստվում համատեղել ԵԱՏՄ անդամակցությունը և ԵՄ ինտեգրումը»։

«ՀՀ-ն ԵՄ անդամակցության հայտ չի ներկայացրել, այդ ուղղությամբ բանակցություններ չեն վարվում, հետևաբար հարցը, որ կարող էր ծագել նման զարգացումների պարագայում, տեղին չէ ու չեմ կարող դատողություններ անել»,- հայտարարել է Միրզոյանը։