«Պետք չէ մոլորեցնել հավաքական վերադարձի մասին պատրանքներով»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Երկու տարի առաջ այս օրը՝ 2023 թվականի մայիսի 23-ին, Արցախի խորհրդարանը աննախադեպ կոշտ տոնով դատապարտեց ՀՀ վարչապետ Նիկոլ Փաշինյանի՝ Արցախը Ադրբեջանի կազմում ճանաչելու հայտարարությունը:
Չափազանց կոշտ էր նաև Արցախի օրենսդիրների հայտարարությունը, երբ Փաշինյանը խոսեց կարգավիճակի հարցում նշաձողը իջեցնելու անհրաժեշտությունից:
Երբ Փաշինյանը ստորագրեց, ստիպված եղավ, պարտադրեցին 2020 թվականի նոյեմբերի 9-ի տեքստը, Արցախը, Հայաստանի ընդդիմությունն ու Սփյուռքի մեծագույն մասը այն համարեց դավաճանություն:
Հետագայում նույն այդ տեսքտին հղում էին անում հայրենի ընդդիմադիրները: Որոշների համար դա փրկության միակ փաստաթուղթն է:
Երբ Փաշինյանը պատերազմի օրերին խոսում էր ժամ առաջ կանգնեցնելու մասին, մեր ընդդիմադիրները նրան մեղադրում էին պարտվողականության մեջ:
Էս շարքը ես կարող եմ շարունակել մինչև երրորդ, երկրորդ, առաջին նախագահ, մինչև Առաջին հանրապետության շրջան, երբ մենք, թվում էր, կարող էինք մի բան ստանալ, բայց ընտրեցինք ոչ թե անհրաժեշտը, այլ ցանկալին:
Պատերազմի պարտության մեջ մեղավոր է օրվա իշխանությունը: Սրա մասին չէ խոսքը: Խոսքն այն մասին է, որ անպատասխանատու հայրենասիրական տեքստերի մեջ կորչում է բանականությունը:
Դիվանագիտության փոխարեն աշխատում է լոբբինգը...
Նախկին արտգործնախարարները կարող են Շուշի ու Հադրութի դեօկուպացիայի մասին խոսել, բայց որոշում կայացնում է իշխանությունը:
Այսօր Արցախում հայ չի մնացել: Սա է դառը իրականությունը:
Պետք չէ մարդկանց մոլորեցնել հավաքական վերադարձի մասին պատրանքներով՝ ինչ է, թե գործ ես ունենալու:
Այսօր գերխընդիրը արցախցիներին Հայաստանում պահելն է»: