«Ինչպե՞ս լուսանցքից դուրս թողնել Նիկոլ Փաշինյանին»․ Սուրեն Սուրենյանց

286

Շաբաթ, 31 մայիսի, 2025 թ., 17:06

Քաղաքագետ Սուրեն Սուրենյանցի թելեգրամյան գրառումը․ «Ինչպե՞ս լուսանցքից դուրս թողնել Փաշինյանին․

«Հայաստանի Հանրապետությունը պետք է վճռորոշ ձայն ունենա Ամենայն հայոց կաթողիկոսի ընտրության հարցում», - Ֆեյսբուքում երեկ գրել է վարչապետ Նիկոլ Փաշինյանը, ով այսօր նույնպես հետևողականորեն շարունակում է Եկեղեցու դեմ արշավը:

«Կաթողիկոսի թեկնածուները պետք է անցնեն բարեվարքության ստուգում։ Այս հարցը մեկընդմիշտ պետք է լուծել», - պնդում է Փաշինյանը:

Հայաստանի Սահմանադրության 17-րդ և 18-րդ հոդվածները սահմանում են Եկեղեցու և պետության բաժանման սկզբունքը, միաժամանակ՝ Հայ Առաքելական Եկեղեցու հատուկ կարգավիճակի ճանաչումը՝ առանց նրան պետական կառույց դարձնելու։

Այսպիսով, Փաշինյանի պնդումները չունեն սահմանադրական, իրավական հիմք և խիստ վտանգավոր են՝ թե՜ քաղաքական և թե՝ իրավական առումներով:

Փաշինյանն ակնհայտորեն վերջնականացնում է «Իրական Հայաստանի» կեղծ թեզը, որին, սակայն, ընդդիմությունը պետք է հակադարձի ոչ թե «ուռահայրենասիրական» կարգախոսներով, այլ՝ այլընտրանքային բովանդակությամբ:

Գործ ունի անելու նաև Եկեղեցին. Փաշինյանի վայրահաչոցներին ու անզուսպ հավակնություններին դիմակայելուն զուգահեռ՝ պետք է մտածել ռեֆորմների, Եկեղեցու սոցիալական և քաղաքակրթական առաքելության արդյունավետ իրացման մասին:

Ասածս այն է, որ ոչ թե մեխանիկական քննադատությամբ պետք է «սնուցենք» Փաշինյանին և նրա հնարավոր արտաքին հովանավորներին, այլ առաջարկենք բովանդակություն, որը կարող է կոնսոլիդացնել հասարակությանը՝ լուսանցքից դուրս թողնելով Փաշինյանին»:

Աղբյուրը` Սուրեն Սուրենյանց