«Ոչինչ, որ մենք՝ մեծերով, մի քիչ վիճենք, իրար հայհոյենք, դուք լուրջ մի՛ վերաբերվեք»․ Աննա Հակոբյանը՝ երեխաներին

ՀՀ վարչապետի կնոջ՝ Աննա Հակոբյանի գրառումը․ «Դիմում եմ Հայաստանի բոլոր քաղաքական գործիչների, դատական, օրենսդիր, գործադիր մարմիններում պաշտոններ ունեցողների, հանրային գործիչների, բոլոր խմբագիրների, լրագրողների, քաղաքական ակտիվիստների երեխաներին.
Սիրելի՜ երեխաներ, համով ձագուկներ, չքնաղ, անարատ արարածներ,
Ես ներողություն եմ խնդրում ձեզանից ձեր փոքրիկ, զուլալ հոգիներին ցավ պատճառելու համար։ Ներողություն եմ խնդրում ձեր պայծառ ու ուրախ մանկության վրա ստվեր գցելու համար։
Ուզում եմ՝ իմանաք, որ մենք ուղղակի մեծական խոսակցություն ունենք, որ պարտավոր ենք մինչև վերջ տանել։ Այս խոսակցությունը հանգամանքների բերումով ընթանում է «մարտեր առանց կանոնների» ժանրով։ Բայց դուք մի՛ հավատացեք ոչ մի բանի։ Լուրջ մի՛ վերաբերվեք ոչ մի բառի։ Մի՛ լսեք, մի՛ դիտեք, մի՛ քննարկեք։ Դա ձեր գործը չէ։
Իմացեք, որ ձեզանից յուրաքանչյուրի հայրիկը ու մայրիկը ամենալավն են։ Նրանք ձեզ անսահման սիրում են։ Նրանք ապրում են ձեզ համար, պայքարում են ձեզ համար, ամեն ինչ անում են ձեզ լավ ներկա և լավ ապագա նվիրելու համար։ Բոլորիդ հայրիկների ու մայրիկների համար դուք ամենակարևորն եք, ամենաթանկը, ամենասիրելին։
Եւ, նորից եմ ասում, չհավատա՛ք լսած ոչ մի խոսքի։ Բոլորի հայրիկներն ամենալավն են, բոլորի մայրիկներն ամենալավն են։
Մենք՝ մեծերս, պարզապես մի քիչ անառողջ, կեղծիքներով պարուրված միջավայր ենք ժառանգել, և ոչ ոք մեղավոր չէ դրա համար։ Բայց մենք ձեր հանդեպ մեծ մեղք գործած կլինենք, եթե նույնը ժառանգենք ձեզ։
Մենք պարտավոր ենք վեր հանել խորը պահած բոլոր ծանր և բարդ հարցերը, խոսել դրանց մասին, լուծել դրանք։ Մենք պարտավիր ենք մաքրել մեր միջավայրը և ձեզ թողնել ոչ միայն բարեկեցիկ պետություն, այլեւ առողջ և բարեկիրթ միջավայր։
Եւ ոչինչ, որ մենք՝ մեծերով, մի քիչ վիճենք, իրար հայհոյենք։ Մենք մեծ ենք, այդ ամենին կդիմանանք։ Իսկ դուք ոչ մի խոսքի մի հավատացեք և լուրջ մի վերաբերվեք։ Մի էլ լսեք՝ գիրք կարդացեք, մուլտեր ու ֆիլմեր դիտեք, բակում իրար հետ պահմտոցի, ֆուտբոլ ու այլ խաղեր խաղացեք։ Շա՜տ սովորեք, լա՜վ սովորեք։ Շա՜տ կարդացեք։ Գիտելիքի մեջ է երջանկությունը։ Գիտելիքի մեջ են բոլոր գաղտնիքներն ու հաղթանկները։
Սիրելի ձագուկներ, շնորհավոր ձեր տոնը և կրկին՝ ներողություն»։