Հունիսի 2-ն Արցախի պետական դրոշի հաստատման օրն է

442

Երկուշաբթի, 02 հունիսի, 2025 թ., 17:48

Արցախի մշակույթի նախարարության հաղորդագրությունը. «Հունիսի 2 — Արցախի Հանրապետության պետական դրոշի հաստատման օրը

1992 թվականի հունիսի 2-ին Արցախի Հանրապետության (ԼՂՀ) Գերագույն խորհուրդը պաշտոնապես հաստատեց պետական դրոշը՝ որպես մեր ազգային ինքնության կարևորագույն խորհրդանիշներից մեկը։

Դրոշի հեղինակը ամերիկահայ Վահե Ֆաթալն է։ Ներկայացված մի քանի տարբերակներից առաջին Գերագույն խորհրդի նախագահ Արթուր Մկրտչյանը ընտրեց հենց այս տարբերակը և ներկայացրեց հաստատման։
Արցախի դրոշը կառուցված է հայկական եռագույնի հիմքի վրա՝ ձախից դեպի աջ ձգվող սպիտակ աստիճանաձև գոտիով, որը միաժամանակ խորհրդանշում է ինչպես մեր պատմական միասնությունը Հայաստանի Հանրապետության հետ, այնպես էլ մեր բռնազավթված բաժանումը՝ անկախության ձգտման ճանապարհին։
Այսօր, երբ մեր ժողովուրդը վերապրում է նոր սպառնալիքներ, բռնագաղթ ու մշակութային ոչնչացում, Արցախի դրոշը շարունակում է մնալ մեր դիմադրության, հիշողության, պատվի և վերադարձի խորհրդանիշը»։

Աղբյուրը` Արցախի մշակույթի նախարարություն