«Իրատեսակա՞ն է առաջիկա ընտրություններում Նիկոլ Փաշինյանի կրելը»․ Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը․ «Իրատեսակա՞ն է առաջիկա ընտրություններում Նիկոլ Փաշինյանին կրելը
2026 թվականի ԱԺ ընտրություններում Նիկոլ Փաշինյանի ՔՊ-ին, կամ նոր բրենդով՝ «Իրական Հայաստանին» կրել պատրաստվողներն ինչի՞ վրա են հույս դրել, մոլորվա՞ծ են, թե՞ մոլորեցնում են հանրությանը։ Անկախ Հայաստանի գոյության 34 տարիների ընթացքում Հայաստանում համապետական ընտրություններով երբեք իշխանություն չի փոխվել, ինչո՞ւ են վստահ, որ 2026-ի ընտրություններով փոխվելու է։ Ստալինն ասում էր, որ կարևոր չէ, թե ոնց են քվեարկում, կարևորն այն է, թե ովքեր են հաշվում քվեները։ Պատահական չէ, որ Նիկոլ Փաշինյանն իր ընտանեկան թերթի լրագրողին կենտրոնական ընտրական հանձնաժողովի նախագահ է դարձրել։ Վերջերս հրապարակվեց, որ ՀՀ բնակչությունը ավելի քան 3 միլիոն է։ Լո՞ւրջ, Հայաստանում նույնիսկ 2,5 միլիոն մարդ չկա։ Այս տարբերությունը առաջիկա ընտրություններում հօգուտ իշխանության վերարտադրման կարող է օգտագործվել։ ԱԺ ընտրություններից առաջ ի՞նչն է խանգարում է, որ արտերկրից նոր, ասենք՝ 500 միլիոն դոլար վարկ վերցնեն ու մարզպետարանների միջոցով որպես սոցիալական օգնություն, կամ սոցիալական ծրագրերի միջոցով բաժանեն կարիքավորներին։ Հայաստանում, սկսած 2004 թվականից, ընտրակաշառք է բաժանվել ու հանրությունն այդ սարսափելի երևույթին սովոր, մասնակից է։ Եթե ԱԺ առաջիկա ընտրություններում նոր տեխնոլոգիաների կիրառմամբ ընտրակաշառքներ բաժանվեն, ասենք՝ խաղաղրույքներ կատարողների առցանց հաշիվները համալրվեն գումարներով, ընդդիմությունը դա ինչպե՞ս է կանխելու։ Նիկոլ Փաշինյանի իշխանության վարկանիշը, եթե նա նույնիսկ Զանգեզուրի միջանցքը, Սյունիքը հանձնի Ադրբեջանին, երբեք չի իջնելու 5 տոկոսից։ Ընտրություններում դրան կարող է գումարվել վարչական, ֆինանսական և այլ ռեսուրսների կիրառմամբ ևս 25 տոկոս քվե։ «Նախկիններից» ոչ մի քաղաքական ուժ առաջիկա ընտրություններում 10-15 տոկոսից ավել չի կարող հավաքել, ընտրողները նրանց ասելու են՝ ձեզ ընտրենք, որ ևս 5 տարի ԱԺ-ում Նիկոլ Փաշինյանին հարցեր տա՞ք։ Չեմ բացառում, որ իշխանությունն առաջիկա ընտրություններում նոր, կեղծ ընդդիմադիր քաղաքական ուժեր, «թաքնված ձիուկներ» խաղի մեջ կմտցնի, որպեսզի ընտրություններից հետո դրանք իշխող ուժի հետ խորհրդարանում դաշինք կազմեն»։