«Վարչապետին անվստահություն հայտնելու գործընթացը կարող է դառնալ այս չարիքի վերջի սկիզբը». Մարգարիտ Եսայան

ՀՀԿ ԳՄ անդամ Մարգարիտ Եսայանի ֆեյսբուքյան գրառումը. «Այն, որ մեր երկիրը օկուպացված է ներսից, ակնհայտ է՝ այլևս որևէ մեկը չի կասկածում, որ մեր պետականության համար պայքարը ազգային-ազատագրական պայքար է և, այդ պայքարում կրավորական կեցվածք ընդունելը խիստ վտանգավոր է և պատիվ չի կարող բերել որևէ քաղաքական ուժի կամ անհատի, ուստի, այս պայքարին մենք պարտավոր ենք տալ ամեն ինչ՝ ջանք, էներգիա, ուժ, համառություն, նվիրվածություն, անսասան հավատ, որ կարող ենք, պարտավոր ենք պայքարել և ոչ՝ ձեռքներս ծալած նստել՝ սպասելով հերթական ընտրությունների։ Քաղաքական ուժը պարտավոր է ունենալ քաղաքական օրակարգ։
ՀՀԿ-ն մշտապես ապացուցել է, որ ունի երկրի փրկության, երկիրն ազատագրելու միակ և անխախտ օրակարգ և անցած յոթը տարիներին ապացուցել է սա՝ լինելով պայքարի առաջնագծում։ Այսօր ևս ՀՀԿ-ն ապացուցեց, որ չի համակերպվել և չի համակերպվելու այս կապիտուլյանտ-դավաճան «իշխանությունների» գոյությանը։ Գործող վարչապետին անվստահություն հայտնելու գործընթացը սահմանադրական այն ճանապարհն է, որը, այո, ճիշտ ռազմավարության, գործընկերների ազնիվ մղումների առկայության և համառության շնորհիվ կարող է դառնալ այս չարիքի վերջի սկիզբը։
Ինքս անձամբ շատ կարևորում եմ ՀՀԿ Գործադիր Մարմնի որոշումը, մեր որոշումը՝ հանձնարարել ԱԺ «Պատիվ ունեմ» խմբակցությանը ՀՀԿ խորհրդից ընտրել անցումային շրջանի համար վարչապետի արժանի թեկնածու, կանգնել նրա կողքին, սատարել և գործընթացը տանել դեպի հաղթական ավարտ։
Հուսամ՝ մեր ընդդիմադիր մյուս գործընկերները, մասնավորապես, «Հայաստան» խմբակցությունը ևս գնահատում է պահի լրջությունը և կկարողանա վեր կանգնել ինչ-ինչ մտքերից և կմիանա այս գործին։
Բոլորիս մաղթում եմ սառը դատողություն, կամք, համերաշխություն, դիմադրողականություն և հավատ, որ այս գործընթացը հաջողելու է։
Այո, լինելու է դժվար, ցավոտ, լինելու է անսպասելի վայրիվերումներով, բայց լինելու է․․․»: