«Փաշինյանը հնազանդություն է պահանջում»․ Վարդան Հարությունյան

Իրավապաշտպան Վարդան Հարությունյանի ֆեյսբուքյան գրառումը. «Ինչո՞ւ են իշխանությունները նոր թափ հաղորդում եկեղեցու դեմ վաղուց սկսած իրենց արշավին։ Սպասվելիք ընտրությունների հետ են կապում։ Նաև քինախնդրություն է։ Եկեղեցին մտավ քաղաքական դաշտ, եկեղեցին չեղավ հնազանդ։ Իսկ Փաշինյանը հնազանդություն է պահանջում։ Եթե հնազանդ չեն, ուրեմն, ջարդել է պետք։ Պետությունն ու իշխանությունը նա այդպես է պատկերացնում։ Այս իմաստով նա Արևմուտքից ու արևմտյան արժեքներից հեռու է այնքան, որքան հեռու կարող է լինել տոտալիտար մտածողությամբ օժտված ցանկացած մեկը։
Հասկանո՞ւմ են, թե ինչ են անում։ Երևի հասկանում են։ Սա, անկասկած, հանպատրաստից չէ։ Սա մտածված քայլ է։
Կարողանալո՞ւ են հեղաշրջում իրականացնել եկեղեցում։ Հավանաբար չեն կարողանալու։ Լավ կլինի, որ չկարողանան։ Պետք է չկարողանան։ Որովհետև այն, ինչ նախաձեռնել են, վատ է։ Այն ոչ միայն եկեղեցու, այլ նաև մեր երկրի, մեր պետության դեմ է ու պետք է համընդհանուր մերժման արժանանա»։