«Ծառայությունից ազատված անձը չի կարող պետական պաշտոն զբաղեցնել»․ Սերգեյ Բագրատյան

ԱԺ պաշտպանության և անվտանգության հարցերի մշտական հանձնաժողովում քննարկվում է «Զինվորական ծառայության և զինծառայողի կարգավիճակի մասին» օրենքում փոփոխություններ կատարելու մասին աղմկահարույց նախագիծը։

ՔՊ-ական պատգամավոր Սերգեյ Բագրատյանն առաջարկեց նախագծում կետ ավելացնել, համաձայն որի ծառայությունից ազատված անձը հետագայում չի կարող զբաղեցնել պատական պաշտոններ․ «Չի լինի, որ մարդը չուզի ծառայել 24 ամիս, հետո ասի 5 տարի կգամ քեզ նախարար կծառայեմ։ Եթե քաղաքացին ամբողջ ծավալով չի ծառայում, իր պարտականությունը չի կատարում ՀՀ-ի նկատմամբ, իրավունք չունի զբաղեցնել բարձրագույն պետական պաշտոններ։ Մարդը պետք է դա հասկանա և ընտի»,-ասաց Բագրատյանը
Քպ-ական պատգամավոր Վահագն Ալեքսանյանը ևս առաջարկ ներկայացրեց, ըստ որի՝ նրանք, ովքեր 2 տարի կծառայեն բանակում, պետք է անվճար կրթություն ստանան ՀՀ պետական համալսարաններում և ունենան առողջապահական անվճար ապահովագրություն։
Հայկ Սարգսյանը պատրաստակամություն հայտնեց առաջարկները ներառել նախագծում և քննարկել։

Հիշեցնենք, ՀՀ կառավարությունը մայիսի 22-ի նիստում հավանության արժանացրեց փոփոխությունների վերաբերյալ նախագիծը։ Պաշտպանության նախարար Սուրեն Պապիկյանը նշեց, որ նախագիծը պահանջում է տեխնիկական լրացումներ․ «Կրճատ ժամկետով ծառայությունը սահմանել՝ մեկ ամսվա դեպքում՝ 24 մլն դրամ, չորս ամսվա դեպքում՝ 18 մլն դրամ։ Յուրաքանչյուր զորակոչի վերաբերյալ կառավարության որոշման մեջ սահմանել զորակոչին համապատասխան՝ կրճատ ժամկետով ծառայության դիմումների առավելագույն քանակը և կարգը։ Պարտադիր զինվորական ծառայություն անցնելու առավելագույն տարիքային շեմը սահմանել 32 տարեկանը»,- ասել էր նախարարը։
Այսօր հանձնաժողովի նիստի ժամանակ ՊՆ փոխնախարարը ներկայացրեց ՊՆ-ի մեկ այլ առաջարկ․ ««Պաշտպանության մասին» օրենքում սահմանել, որ մինչև 16 տարին լրանալը արական սեռի քաղաքացիները ՀՀ-ի նկատմամբ ունենան 15 մլն դրամի հանրային և իրավական պարտավորություն։ Այդ պարտավորությունը դադարում է՝ արական սեռի քաղաքացուն զինվորական հաշվառման վերցնելու փաստի ուժով կամ ՀՀ քաղաքացիությունից դուրս գալու դեպքում՝ հօգուտ պետական բյուջեի վճարման միջոցով»։