«Տեղի ունեցածը ոչ միայն Իրանի համար է սպառնալիք, այլև Հայաստանի համար խնդիր է». Արմեն Գրիգորյան

«Այսօր տեղի ունեցածը ոչ միայն Իրանի կամ Մերձավոր Արևելքի համար է սպառնալիք, այլև Հայաստանի համար խնդիր է»,- այսօր «ԱՊՐԻ Արմենիա»-ի ֆորումում, «Սպուտնիկ Արմենիա»-ի հաղորդմամբ հայտարարել է Հայաստանի անվտանգության խորհրդի քարտուղար Արմեն Գրիգորյանը:

«Հայաստանի անվտանգության հիմնական սպառնալիքը շարունակում է մնալ դասական անվտանգային սպառնալիքը, այսինքն՝ ռազմական սպառնալիքը ոչ միայն Հայաստանում, այլև տարածաշրջանում։ Այսօր տեղի ունեցածը ոչ միայն Իրանի կամ Մերձավոր Արևելքի համար է սպառնալիք, այլև Հայաստանի համար խնդիր է։ Հայաստանը շարունակում է աշխատել, որպեսզի կարողանա իր մասնաբաժին կայունությունը տարածաշրջան բերելու»,- հայտարարել է նա։

Մեկնաբանելով Իսրայելի կողմից Իրանի վրա հարձակումները և Հայաստանի համար հնարավոր հետևանքները՝ նա նշել է, որ Հայաստանը դեռևս ժամանակներ առաջ սկսել է նախապատրաստվել հնարավոր սցենարներին։

Նա ընդգծել է, որ ցանկացած էսկալացիա ապակայունություն է բերում տարածաշրջանում, և որևէ դրական բան չի կարող լինել նման էսկալացիաների տարբերակում ։

«Սա Իրանի տարածքային ամբողջականության նկատմամբ ոտնձգություն է, որը, բնականաբար, բացասական ազդեցություն է ունենալու տարածաշրջանում և ոչ մի օգուտ տարածաշրջանին չի բերելու», – ասել է Գրիգորյանը։

Նա հույս է հայտնել, որ հարցը հնարավորինս շուտ կկարգավորվի խաղաղ ճանապարհով։