«Ինչեր ասես չենք լսելու «Բենդերի ժառանգորդ» այս իշխանություններից»․ Արմինե Օհանյան

«Հրապարակ» օրաթերթի խմբագիր Արմինե Օհանյանի ֆեյսբուքյան գրառումը․ «Որքան երկրի վիճակը լրջանում է, այնքան նախընտրական տարին ավելի թեժ է լինում: Մի կողմից՝ գործող իշխանությունն է կենաց-մահու պայքար մղում՝ վերարտադրվելու համար, և դրա համար միջոցների մեջ խտրություն չի դնում: Մյուս կողմից՝ այլ քաղաքական ուժեր ու աշխարհաքաղաքական կենտրոններ են մտնում կատաղի պայքարի մեջ: Բայց այս անգամ մի տեսակ շատ շուտ սկսվեց նախընտրական թոհուբոհը, ինչը նշանակում է, որ բանը կարող է անգամ ընտրություններին չհասնել: Գոտկատեղից ցածր հարվածներ, ոչ նորմատիվային լեքսիկոն, կրթարշավներ ու հեծանվավազքեր, այս ու այն դաշտից մարդ գողանալու փորձեր, քրեական հետապնդումներ, շանտաժ, սպառնալիքներ եւ ամենակարևոր զենքը՝ պոպուլիզմ: Վերջինի մասնագետն, անշուշտ, Փաշինյանն ու իր թիմն են, որոնք անիրականանալի խոստումներ տալու անգերազանցելլի վարպետներ են: Հիմա գզրոցներից հանում են տարբեր փոշոտված թեմաներ, նոր գաղափարներ են երկնում, աշխատում են ևս մեկ անգամ մոլորեցնել մեր շփոթահար հասարակությանը, որ քվե կորզեն՝ այս անգամ վերջնականապես պետությունը կործանելու համար: Եվ քանի որ ո՛չ ամոթ ունեն, ո՛չ կարմիր գծեր, ո՛չ սկզբունքներ ու արժեհամակարգ, ինչ ասես՝ դնելու են շրջանառության մեջ: Տարբեր «ձկներ ու մկներ» են ձերբակալվելու, Աջափնյակի մետրոյի արդեն պատմական թեման են նորացնելու, շենգեն վիզաների ազատականացման թեմայով են մեծ-մեծ խոստումներ տալու: Ինչեր ասես չենք լսելու «Բենդերի ժառանգորդ» այս իշխանություններից՝ էլ ակադեմիական քաղաք ու չոր նավահանգիստ, էլ հայկական արբանյակ ու արհեստական բանականության հայրենիք, էլ հերթ կանգնած ներդրողներ ու խաղաղության- ինքնիշխանության ամրոցներ: Աստված մեզ ուժ, համբերություն և առողջություն տա, որ դիմանանք այդ ամենին»: