«Թող Կտրիճ Ներսիսյանը հանրությանը ներկայացնի իր զավակին կամ զավակներին, որովհետև Գրիգոր Լուսավորիչը չի թաքցրել»․ Նիկոլ Փաշինյան

«Եթե Գրիգոր Լուսավորչի հետ է զուգահեռը, թող Կտրիճ Ներսիսյանը ներկայացնի հանրությանն իր զավակին կամ իր զավակներին, որովհետև Գրիգոր Լուսավորիչը հանրությունից չի թաքցրել իր զավակներին, որովհետև նա մինչև քրիստոնեության ընդունումը և Եկեղեցու հիմնադրումն մի քիչ այլ կարգավիճակ է ունեցել» ,- ԱԺ-Կառավարություն հարցուպատասխանի ժամանակ այս մասին նշեց վարչապետ Նիկոլ Փաշինյանը՝ անդրադառնալով դիտարկմանը, թե Գրիգոր Լուսավորիչը, որ կաթողիկոս է եղել, նույնպես երեխա է ունեցել:

Փաշինյանը հիշեցրեց 356 թվականի Աշտիշատի ժողովի մասին, որից հետո սահմանվել է կուսակրոնության պարտադիր պայման լինելը։ Նա կուսակրոնության ուխտի մասին մեջբերումներ կարդաց «Կանոնագիրք հայոց»-ից, ապա հավելեց. «Սա նշանակում է, որ, օրինակ՝ Կտրիճ Ներսիսյանը ոչ միայն կաթողիկոս լինելու իրավունք չունի, այլև որևէ քահանայական ծես իրականացնելու իրավունք չունի, որովհետև նա, այս կանոնների համաձայն, պղծության, շնության, պոռնկության և այլ մեղքերի բերումով դադարում է լինել եպիսկոպոս, դադարում է լինել քահանա, դադարում է լինել կաթողիկոս՝ ըստ Հայ Առաքելական Եկեղեցու կանոնների և ավանդների»: