«Եթե ակնհայտ լինի քաղաքական հետապնդման տարրերի առկայությունը, պետք է այս հարցին անդրադարձ կատարել»․ Անահիտ Մանասյան

Մարդու իրավունքների պաշտպան Անահիտ Մանասյանը «Ֆակտոր»-ի հետ զրույցում անդրադառնալով հարցին, թե գործարար Սամվել Կարապետյանի տան խուզարկությունից հետո բերման ենթարկված մոտ 40 անձինք արդյոք դիմել են օմբուդսմենի գրասենյակ՝ բողոքարկելով իրավաբանների գործողություններից, նշեց․ «Այս հարցով ստացել ենք մեկ ահազանգ փաստաբանից, այն մասին, որ բերման ենթարկված անձինք ազատությունից զրկված կարգավիճակում պահվել են օրենքով նախատեսված ժամանակից ավելի երկար։ Ես սպասում եմ գրավոր պարզաբանումների, եթե չստանանք բավարար պարզաբանում, ապա դա կարող է մտահոգիչ հանգամանք լինել, և այդ առնչությամբ կարտահայտեմ իմ դիրքորոշումը»։

Հարցին, թե արդյոք իր բնորոշմամբ այլախոհության ճնշման փո՞րձ է Սամվել Կարապետյանի նկատմամբ հարուցված քրեական գործը, խուզարկությունը, Մանասյանը պատասխաեց, որ տեղեկատվության հավաքագրման փուլում է և չի կարող վերջնական դիրքորոշում արտահայտել․ «Սկսել եմ ուսումնասիրության ընթացակարգ՝ այս հարցի հետ կապված․․․ Եթե ակնհայտ լինի քաղաքական հետապնդման տարրերի առկայությունը, պետք է այս հարցին անդրադարձ կատարել»։

Ի պատասխան հարցի, թե արդյոք Հայաստանում ընդհանրապես քաղաքական հետապնդումներ են իրականացվում և կան քաղաքական բանտարկյալներ, Մանասյանն արձագանքեց․ «Այո, մենք ունենք քաղաքական գործիչներ, ովքեր այս փուլում քրեական հետապնդման են ենթարկվում, ես չեմ կարող այս պահի դրությամբ նշել, որ բացառապես քաղաքական նպատակներով է նրանց նկատմամբ իրականացվող գործընթացը, ՀՀ-ում որևէ ՄԻՊ իրեն թույլ չի տվել որևէ մեկին քաղբանտարկյալ անվանել (չնայած տարատեսակ խնդիրների առկայության մասին խոսել են), որովհետև դա շատ պատասխանատու հայտարարություն կլինի»։