«Ակնհայտ է, որ սա ոչ թե իրավական, այլ քաղաքական գործընթաց է»․ Տարոն Սիմոնյան

«Ակնհայտ է, որ սա ոչ թե իրավական, այլ քաղաքական գործընթաց է, և գործադիր իշխանության ղեկավարը դա չի թաքցնում իր հայտարարություններում»,- այս մասին Երևանի ընդհանուր իրավասության առաջին ատյանի դատարանի բակում լրագրողների հետ զրույցում նշեց ԱԺ նախկին պատգամավոր Տարոն Սիմոնյանը՝ անդրադառնալով գործարար Սամվել Կարապետյանի ձերբակալմանը և կալանավորման միջնորդության քննությանը։

«Փաստաբաններն արդեն նշել են, որ գործն անհիմն է, իրավական հիմքերը բացակայում են։ Հույս ունենք, որ մասնագիտական բարոյականությունը կգերակայի, և կստանանք այնպիսի որոշում, որը կհամապատասխանի ՀՀ օրենսդրությանը»,- հավելեց Սիմոնյանը։

Նշենք, որ Երևանի ընդհանուր իրավասության քրեական դատարանում քննվում է Սամվել Կարապետյանի նկատմամբ կալանքը որպես խափանման միջոց կիրառելու վերաբերյալ միջնորդությունը։ Դատարանը հեռացել է խորհրդակցական սենյակ։

Հիշեցնենք, որ Սամվել Կարապետյանին մեղադրանք է առաջադրվել Քրեական օրենսգրքի 422-րդ հոդվածի 2-րդ մասով, այն է՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչը, որը կատարվել է հրապարակայնորեն ցուցադրվող ստեղծագործությունները կամ զանգվածային լրատվության միջոցները կամ տեղեկատվական կամ հաղորդակցական տեխնոլոգիաներն օգտագործելով: