«Իշխանության կարծիքից տարբերվող կարծիք ունենալու համար քաղաքական հետապնդումների են ենթարկվում»․ Տիգրան Աբրահամյան

«Սովորական դարձած սցենար է, երբ որ իշխանությունն իր համար ընտրում է թիրախ և այդ թիրախի ուղղությամբ աշխատում բոլոր մակարդակներով․ կոնկրետ այս իրավիճակը փոխկապակցված է Մայր Աթոռի դեմ հարձակումների հետ»,- այս մասին Երևանի ընդհանուր իրավասության առաջի ատյանի դատարանի բակում լրագրողների հետ զրույցում նշեց «Պատիվ ունեմ» խմբակցության պատգամավոր Տիգրան Աբրահամյանը՝ անդրադառնալով գործարար Սամվել Կարապետյանի ձերբակալմանը և կալանավորման միջնորդության քննությանը։

Աբրահամյանի խոսքով՝ բոլոր այն գործիչները և ուժերը, որոնք իրենց զորակցությունն են հայտնում Հայ առաքելական եկեղեցուն, դառնում են իշխանությունների համար թիրախ։

Պատգամավորի դիտարկմամբ՝ Սամվել Կարապետյանի հայտարարության հիմքում իշխանազավթման կամ սահմանադրական կարգի տապալման որևէ տարր չկա։

«Այս իշխանությունը ո՛չ քաղաքական, ո՛չ բարոյական, ո՛չ իրավական որևէ հիմք չունի որևէ բան ասելու նրանց, ովքեր սատարում են Եկեղեցուն։ Մարդիկ իշխանության կարծիքից տարբերվող կարծիք ունենալու համար քաղաքական հետապնդումների են ենթարկվում»,- ընդգծեց պատգամավորը։

Նշենք, որ Երևանի ընդհանուր իրավասության քրեական դատարանում քննվում է Սամվել Կարապետյանի նկատմամբ կալանքը որպես խափանման միջոց կիրառելու վերաբերյալ միջնորդությունը։ Դատարանը հեռացել է խորհրդակցական սենյակ։

Հիշեցնենք, որ Սամվել Կարապետյանին մեղադրանք է առաջադրվել Քրեական օրենսգրքի 422-րդ հոդվածի 2-րդ մասով, այն է՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչը, որը կատարվել է հրապարակայնորեն ցուցադրվող ստեղծագործությունները կամ զանգվածային լրատվության միջոցները կամ տեղեկատվական կամ հաղորդակցական տեխնոլոգիաներն օգտագործելով: