«Դատախազը չի կարողանում հիմնավորել մեղադրանքը»․ Ռուբեն Հակոբյան

«Սամվել Կարապետյանն իր դիրքորոշումը դատարանում հայտնել է ներկայացված մեղադրանքի և միջնորդության վերաբերյալ, նշել է, որ մեղադրանքը բացարձակ անհիմն է, որևէ հանցանքի մասին խոսելն առնվազն անլուրջ է»,- այս մասին լրագրողների հետ զրույցում հայտնեց գործարար Սամվել Կարապետյանի փաստաբան Ռուբեն Հակոբյանը։

Փաստաբանն ընդգծեց, որ իր կարծիքով՝ դատախազը չի կարողանում հիմնավորել մեղադրանքը։

«Ես իրավական գնահատական եմ տալիս․ սա բացարձակ ապօրինի գործընթաց է, մենք իրավական պրոցեսի ականատեսը չենք»,- հավելեց Հակոբյանը։

Նշենք, որ Երևանի ընդհանուր իրավասության դատարանում 5 ժամից ավելի է քննվում է Սամվել Կարապետյանի նկատմամբ կալանքը որպես խափանման միջոց կիրառելու վերաբերյալ միջնորդությունը։ Դատարանը հեռացել է խորհրդակցական սենյակ։

Հիշեցնենք՝ գործարարին մեղադրանք է առաջադրվել ՀՀ քրեական օրենսգրքի 422-րդ հոդվածի 2-րդ մասով, այն է՝ իշխանությունը զավթելուն, տարածքային ամբողջականությունը խախտելուն, ինքնիշխանությունից հրաժարվելուն կամ սահմանադրական կարգը բռնի տապալելուն ուղղված հրապարակային կոչը, որը կատարվել է հրապարակայնորեն ցուցադրվող ստեղծագործությունները կամ զանգվածային լրատվության միջոցները կամ տեղեկատվական կամ հաղորդակցական տեխնոլոգիաներն օգտագործելով: