«Իրանը բարձրացրեց խաղադրույքները, մեծացավ անկանխատեսելիությունը»․ Գոռ Աբրահամյան

ՔԿ նախագահի նախկին մամուլի քարտուղար Գոռ Աբրահամյանի ֆեյսբուքյան գրառումը․ «Մինչև հիմա գործ ունեինք ամերիկյան ռեվերանսներով իրանա-իսրայելական ռազմական փոխադարձ հեռահար օպերացիաների հետ։ Հիմա ամբողջ Ծոցի տարածաշրջանում արաբական երկրների տարածքներում ԱՄՆ ռազմակայանները թիրախավորելով Իրանն այդ գործողությունները վերածեց իսկական լայնածավալ պատերազմի նախերգանքի, որի առաջին նոտաները նվագել է ԱՄՆ-ն։
Եվ դա տեղի ունեցավ Իրանի արտգործնախարար Արաղչիի՝ ՌԴ նախագահ Պուտինին հանդիպելուց հետո։ Իրանը մի քանի մակարդակ բարձրացրեց խաղադրույքները, նույնքան մեծացավ անկանխատեսելիության մակարդակը. դեռ պետք է հասկանալ ԱՄՆ-ն կգնա պատասխանի, թե ոչ, ու Ռուսաստանը միջուկային պաշտպանության տակ կառնի՞ Իրանը, թե էլի «կգցի» իր ռազմավարական դաշնակցին։
Ո՛չ տարածաշրջանում, ո՛չ էլ դրանից դուրս ոչ մի գերխաղացող այլևս չի կարող անտարբեր ու դիտորդ մնալ»։